आज वार इतवार

आज वार इतवार, आज घर-बार संभाळो।
आज वार इतवार, टूर पसवाड़ै टाळो।
आज वार इतवार, नहीं कित आणो-जाणो।
आज वार इतवार, न को महमान बुलाणो।
बैठ कर आज परिवार बिच, बिनां बात बातां करो।
गजराज तणी इण गल्ल पर, ध्यान नेक मीतां धरो।।

दौड़-धूप दिन-रैन, ‘फेन’ ज्यूं फेरम्फेरा।
दिल री मिटै न दैन, मिटै नंहि तेरा-मेरा।
प्रात उठंतां पाण, बाण पण सागण बाही।
नफो भलां नुकसाण, राह वा वै ही राही।
आज ओ दिवस अवकास रो, हेत-हथायां रँग भरो।
गजराज तणी इण गल्ल पर, ध्यान नेक मीतां धरो।।

बैठो चौक बिचाळ, ढंग सर जाजम ढाळो।
मारू मन मनवार, नेह निजरां सूं न्हाळो।
चंगी इक इक चीज, जकी कर कोड जचाई।
उण बेटी री आज, बोल मुख करो बडाई।
चाव सूं बैठ चौपड़ रमो, स्यार-स्यार सुख संचरो।
गजराज तणी इण गल्ल पर, ध्यान नेक मीतां धरो।।

रोळा करो न रीस, बाळ-टोळा हरखाओ।
स्याणप-चोळा छोड, बणो भोळा बंतळाओ।
हेत हबोळां बीच, सींच कुळरीत सवाई।
सुण सैणां सूं साच, भड़क मत व्हाला भाई।
खुद री खामी अर खूबियां, आज बैठ घर आदरो।
गजराज तणी इण गल्ल पर, ध्यान नेक मीतां धरो।।

~~डॉ. गजादान चारण “शक्तिसुत”