आवड मां रा रंग रा दूहा

नाम लेय नामी भयी,जग बाजी जगदंब।
उण करनल री इष्ट जो,वा वड आवड रंग॥97
जिणनें सब जग में नमें,दीन अर दुखी दबंग।
तखत तेमडै जो तपै,वा वड आवड रंग॥98
लोवड सूर लुकावियो,भाई डसत भुजंग।
खरी खोडली री बहन,मावड आवड रंग॥99
रवि रथ सगती रोकियो,देख’र दुनिया दंग।
चारण कुळ अँजसावणी,मावड आवड रंग॥100
कोर जरी री कांचळी,ओपे लोवड अंग।
बाजूबँध दुय बांह में,वा वड आवड रंग॥101
जिण रे मढ मँह झांझ डफ,मादळ भेरि मृदंग।
रेवै बाजत रैण दिन,वा वड आवड रंग॥102
खाळ रगत जद खळखळै,खड खड बाजै खंग।
उण पळ आय उबारणी,आवड मावड रंग॥103
झेरीला झाझा रखै,भेळा घणा भुजंग।
दैत दळां ने दाबवा,वा वड आवड रंग॥104
दरस करंता दास रे,उर घण होय उमंग।
मात सात सँग भ्रात मय,मावड आवड रंग॥105
मढ आगै नित मात रे,कुदै घणा कुरंग।
चाळकना री चारणी,मावड आवड रंग॥106
दिन दिन दीवाळी मढां,रोज रोज उछरंग।
तखत तेमडै री धणी,आवड मावड रंग॥107
जिण दरसण परसण कियां, मन हुय निरमळ गंग।
चाळकने री चारणी, आवड मां नें रंग॥108
उर सांभळता अंजसे,परवाडा परसंग।
वड थड बीसभुजी वदी,मावड आवड रंग॥109
गरब खळां रा गंजणी,भय मन करणी भंग।
जोगण जूनी जाळ री,आवड मावड रंग॥110
बणै मात जिण वाहरू,जीत दिरावै जंग।
तखत तेमडा री धणी,मावड आवड रंग॥111
साचै मन सूं सेविया,सदा सेवकां संग।
मनरँगथळ री मावडी,धावड आवड रंग॥112
असि वाहै अरि रो कियो,अंबर ढग उतबंग।
वा वैरी दळ वाढणी,मावड आवड रंग॥113
दळ अरि दंडण कारणे,भोंह करी जिण तंग।
जबर मात जमदाढ सम,वा वड आवड रंग॥114
लोवड जिणी लुकावियो, प्राची तणो पतंग।
भली मात निज भ्रात कज,वा वड आवड रंग॥115
तखत बिराजै तेमडै,भाई महिरख संग।
जोगण सातां झूलरै,वा वड आवड रंग॥116
कटक जिमायौ कुल्लडी,शेखा दळ बळ संग।
उण करनल री इष्ट जो,वा वड आवड रंग॥117
जिण लाखण जीवाडियो,जम सूं कर नें जंग।
उण करनल री इष्ट जो,वा वड आवड रंग॥118
जबर जितायौ जैतसी,कामर सूं कर जंग।
उण करनल री इष्ट जो,वा वड आवड रंग॥119
सेखो लायो सिंध सूं,बण नें चील विहंग।
उण करनल री इष्ट जो,वा वड आवड रंग॥120
सात सिंह रथ स्वार हुय,चाबुक करे भुजंग।
हंकारै खळ नें हणण,वा वड आवड रंग॥121
जद हुंकारे जोगणी,ध्वनि जिम कोटिक भृंग।
असि लेयर अरियां हणण, वा वड आवड रंग॥122
धोरां री धणियांण है,रहै थळां मन रंग।
जोगण जूनी जाळ री,मावड आवड रंग॥123
मानव किन्नर जक्ष सुर,कीटक वळे विहंग।
प्राणी मात्र ने पाळणी,मावड आवड रंग॥124
छपन क्रोड नव लाख अर,चौरासी मँझ अंग।
वा विराट वपु धारिणी,आवड मावड रंग॥125
भले गूंथियो भेळियो,भेळा करे भुजंग।
जिण नें धारणी आवडा, मावड ने घण रंग॥126
खळ बळ दळ खंडण करण,किय सिंह जीन तंग।
वा विराट वपु आवडा, मावड नें घण रंग॥127
आखै नरपत आसिया, चारण री अवलंब।
जोगण जय जय आप री,आवड मां लख रंग॥128

~~नरपत आसिया “वैतालिक”

“आवड आखे आसिया” से

Leave a Reply

Your email address will not be published. Required fields are marked *