बिरवडी वंदना

🌹दोहा🌹
वडी मावडी बिरवडी, सदा खडी सिसु साथ।
लडी भाव छंदां जडी, पहरावूं उठ प्रात।।

🌹छंद त्रिभंगी🌹
वरदानी वाहर, जोगण जाहर, पूजित हरि हर, अर ब्रह्मा।
नित प्रत चढ नाहर, बैठी भाखर, सुर नर किन्नर, करे खमा।
सुख करूणा सागर, रीझ अमां पर, भाव ह्रदय भर, निरमल मां
बिरवड बिरदाली़, रखौ रूखाल़ी, वीस भुजाली, वंदन मां।। १

चखडा धी चारण, नाम वधारण, काजसुधारण भव तारण।
अंबा अवतारण, जन जग कारण, दुष्ट संहारण, खल डारण।
नित पार उतारण, सगती समरण, नेह निहारण, तूं जग मां।
बिरबड बिरदाल़ी, रखो रूखाली, बीस भुजाली वंदन मां।। २

चित्तौड चढाई, फौज सवाई, चढ जद आई, तुरकाई।
धर धाबल ध्यायी, करौ सहाई, मां महमाई, थूं बाई।
बारू बुलवाई, की अगवाई, जुध जितवाई, जोगण मां।
बिरबड बिरदाली, रखो रूखाली, बीस भुजाली, वंदन मां।। ३

धर धाबल काल़ी, बैठी बाल़ी, नवघण भाल़ी, करुणाल़ी।
फौजां कज थाल़ी, मां ममताल़ी, कर पतराल़ी, तरूवाल़ी।
नृप रियौ निहाल़ी, जीमण वाली, अनपुरणाल़ी, पंगत मां।
बिरबड बिरदाली, रखो रूखाली, बीस भुजाली वंदन मां।। ४

नित शीस नमावूं, चिरजा गावूं, जोत जगावूं, हरखावूं।
धर धूप रिझाऊं, छंद चडाऊ, मात सुणाऊं, चित ध्यावूं।
मन मोद मनांऊं, बहु बिरदाऊं, जगत जगाऊं, कह जस मां।
बिरबड बिरदाली, रखौ रूखाली, बीस भुजाल़ी, वंदन मां।। ५

चाकर रख चंडी, खल दल खंडी, देवल झंडी, लाल लसै।
दहिता जग दंडी, नमो प्रचंडी, धर खल मुंडी, हास हसै।
तव जोत अखंडी, जग जन वंदी, मां जग मंडित, रूप रमा।
बिरवड बिरदाली, रखौ रुखाली, बीस भुजाली, वंदन मां।। ६

वीदग नें वरदे, सुंदर स्वर दे, शुभ आखर दे, लयछंदे।
उकति उर भरदे, कल्पक कर दे, कवित अमर दे, यति सुर दे।
जय जोगण जय दे, गज गय हय दे, भवा अभय दे, बाल़क मां।
बिरवड बिरदाली़, रखौ रुखाल़ी, बीस भुजाली, वंदन मां।। ७

चरणां रो चाकर, नरपत नें कर, रीझ अमां पर, रख किंकर।
भटकूं भव फर फर, लधै न पथ पर, जीवूं डर डर, हूं कीकर।
नित नेह निजर कर, हे करूणाकर, आठ पहर घट चौसठ मां।
बिरवड बिरदाल़ी, रखौ रूखाली, बीस भुजाल़ी, वंदन मां।। ८

🌹कलश छप्पय🌹
बिरवड जग विख्यात, आप अंबा अनपूरण।
बिरवड जग विख्यात, चंड मुंड करणी चूरण।
बिरवड जग विख्यात, नमों मां नेह निहाल़ण।
बिरबड जग विख्यात, सदा कव काज सुधारण।
नित नरपत तौ करतो नमन, छतराल़ी कर छाय रे।
बिरदाल़ अंब रखवाल तूं, बाल़क री गह बांय रे।।
कटक निवतिया कुल्लडी, वडी विरवडी देव।
काज ओंपणे है खडी, सुध चित नरपत सेव।।