वैश्विक महामारी “कोरोना”

मिनखां रो कोरो ‘ना’ अर परकत रो कोरोना

राजस्थानी में अेक ठावकी कैबत है कै ‘‘हाथ कमाया कामड़ा, किणनैं दीजे दोस/ बाबाजी री पालड़ी, कांदां लीनी खोस’’। इण ‘कोरोना’ री महामारी वाळै कहर रै सामी लाचार अर साहूकार बणेड़ै मानखै नैं देख’र साफ-साफ समझ आवै कै मिनखां जद आपरै मूळ सभाव नैं छोड’र अनीति धार ली तो परकत पसवाड़ो फेरती ओ ‘कोरोना’ वाळो पासो फैंक दियो। जद मिनखां आपरी मांयली चाहत नैं मार’र स्वारथ रो पैंडो करणो सरू कर दियो तो पछै परकत चुप क्यूँ बैठे? आपणा बडेरा कैवता आया है कै ‘‘भाई! जे उत्तर ई देवणो है तो मूंढै रो नहीं, हाथ रो उत्तर देओ’’ मतलब कै कोई आपसूं आस लेय’र आवै अर आप उण काम सारू सक्षम हो तो पछै उणनैं चट्टो उत्तर नीं देवणो चाईजै। सजै जिसो ई सही पण हाथ रो उत्तर देवणो चाईजै पण आज रै मानखै तो कोरी ‘ना’ कैवणी सरू करी तो बा करी कै ‘हाँ’ वाळो खातो ई बन्द कर दियो। मिनखां नैं कोरो ‘ना’ कैवण री इसी आदत पड़ी कै हर ठौड़ कोरी ‘ना’ ई ‘ना’। कोई सूं दो रिपिया उधार ले लियो तो पाछो देवण में कोरो ‘ना’। बूढै मायतां री सेवा करण री बात आई तो कोरो ‘ना’। रिश्तां री पवित्रता निभावण री टेम आई तो कोरो ‘ना’। सद-संस्कारां नैं अपणावण री बात हुई तो कोरो ‘ना’। मुन्ना भाई एमबीबीएस बणण रै चक्कर में इसा आया कै ईमानदारी सूं परीक्षा देवण में ई कोरो ‘ना’। समरथ होवतां थकां ई चंदो-चिट्ठो देवण री वेळा में कोरो ‘ना’। मायतां री बात मानण में कोरो ‘ना’। कोई कैयो कै भाई-भाई भेळा बैठ’र हेत री हथाई करो, उत्तर सागण कोरो ‘ना’। अधिकारां सारू अड़थड़तै मानखै जाणबूझ’र करतब-पथ पर पावंडो धरण री बात पर कोरो ‘ना’ कैवण में आपरो रुतबो मानणो सरू कर दियो। घणी बातां में के पड़्यो है आपां सगळां आप-आपरी बाण छोड़’र स्वारथ रो पल्लो पकड़ लियो अर हर जोगती बात में ई कोरो ‘ना’ कैवणो सरू कर दियो। और तो और आज तो व्यक्तित्व निरमाण री कक्षावां में ई ‘ट्राई टू से नो’ यानी ‘ना कैवणो सीखो’ रा पाठ लागग्या अर इणरो अभ्यास करावणो सरू करीजग्यो। कूवै ई भांग पड़गी। दाई भली न फत्ती। बेजोगती पर तो बजराक ई आवै। छेवट आपणी इण कोरी ‘ना’ री बेजोगती आदत सूं आखती होय आज परकत आपां नैं ओ ‘कोरोना’ बजराक दे दियो। अबै बोबाड़ा मारो। हियै ऊकलै कोनी अर कैयोड़ी कोई रै बाप री ई मानां कोनी। अबै सुधारो कियाँ हुवै। बडेरां रो कैयोड़ो है कै 24 घंटां में एक पल इयांकलो आवै, जिणमें मिनख जकी बात बोलै, बा साची हुवै। आपां मानां या नीं मानां पण आ परकत तो सगळां री आस पूरण वाळा है, इण कारण आपां सगळां रो कोरो ‘ना’ सुण’र अण आपणी चावना पूरी कर दी कै चौबीसूं घंटा ई कोरोना कोरोना बोलता थारी मनगत पूरी करो। खैर! इणनैं आपां परकत कानी सूं सुधरण रो संकेत मानल्यां तो ई अजे कोई आसमान कोनी टूट्यो। अजे ई आपां आपणै मूळ सभाव नैं पकड़ण रा जतन करां, तो सांवरियो हेलो साँभळ लेवै।

‘परकत’ सबद रो सीधो-सीधो अरथ है प्रकृति यानी सभाव या मिजाज। ओ सभाव ई वो मूळ तत्त्व है, जिणरो परिणाम ओ समूचो जीव-जगत है। मोटै अरथ में देखां जद ओ समूचो ब्रह्मांड उणरै दायरै में आवै। आपां इणनैं इयां समझ सकां कै ओ सगळो प्राकृतिक, भौतिक अर पदार्थिक जगत अेकठ में परकत रो ई वाचक है। जद परकत यानी सभाव अर खास कर मानखै रै सभाव री बात करां तो संस्कृत रा ग्रंथां सूं जाणकारी मिलै कै आहार, निद्रा, भय अर मैथुन वाळा कामां-धामां में तो मिनख अर जानवर में कोई फरक है ई कोनी। मिनख नैं मिनख बणावण वाळो तत्त्व तो ‘विवेक’ है, जिणरो जानवरां में अभाव हुवै अर असल में ओ विवेक ई मिनख रो सांतरो सभाव हुवै। इण विवेक रै कारण ई वो करणीय अर अकरणीय रो आंतरो समझै। दया, क्षमा, परोपकार, सहयोग, समन्वय, सहकार, राष्ट्रीयता, मानवता अर विश्वबंधुत्व री भावनावां नैं समझै, स्वीकारै अर अंगीकार करतां आचरण में उतारै। आं गुणां रै कारण री मिनखा-देही नैं ऊपर वाळै री व्हाली कारीगरी मानीजी है। इण मिनखां देही रो सिरजणहार, जद देखै कै मिनख पेट भर्यां पछै पेटी भरण रै जुगाड़ में आपरै करम-धरम नैं ऊंचा टांग दिया तो कितरा दिन सबर करै। छेवट तो अेक दिन ‘सौ सुनार री अर अेक लुहार री’ वाळी बात चरितार्थ होवणी ई ही। अर आ कोरोना बण’र आपणै सामी है।

आपणै लोकजीवण में मिनखां रै काम काज नैं लेय अेक चावी-ठावी ओळी है ‘‘उत्तम खेती, मध्यम बाण/अधम चाकरी, भीख निदाण’’ इणरो अरथ है कै इण संसार में सबसू व्हालो अर श्रेष्ठ काम है खेती करणो। दूजै नंबर रो काम है बाण यानी बिणज-बोपार करणो। तीजै अर अधम दरजै रो काम है नौकरी-चाकरी करणो अर सबसूं गयो-गुजरो काम है भीख मांग’र खावणो। जे सावळसर निजर पसार’र निरपेखी भाव सूं देखां तो किरसाण हुओ भलां बाण (बाणियां यानी बोपारी), नौकरी हुओ भलांई लाचारी, सगळां आप-आपरा महताऊ मारग छोड दिया अर उजड़ चालणो सरू कर दियो। किरसाण जद खेती करतो तो चीड़ी, कमेड़ी, राहू-बटाऊ, बैन-भाणजी, सांड, मंदिर-देवरै सारू आपरी फसल रो अेक हिस्सो राखतो। पण आपां देखां कै कोई मारग चालतै जे मतीरो तोड़’र ई खा लियो तो थाणा-मुकद्दमा होग्या। सरकारी बीमा वाळो रोग इस्यो चाल्यो है कै लोगां री नीत खराब होवण लागगी। घणकरा तो इण जुगाड़ में ई रैवै कै गिरदावळजी कद आवै अर कद काळ घोषित करै का आपणी फसलां रो खराबो लिख देवै। सामां दोय रिपिया देय’र ई जमाबंदी में काळ लिखावण सारू अड़थड़ै। मेह सूं ज्यादा इंतजार फेमन चालण रो करै। खैर!

बाणियां री बहियां में ब्याज री फळावट रो गोरखधंधो कोई सूं छानो कोनी। बाणियां सूं मतलब कोई खास जात री बात कोनी, बिणज बोपार करणियां सगळा इणमें भेळा है। खावण-पीवण री चीजां में गधां री लीद अर ईंट रो पावडर मिलावण जिसी अजोगती आदतां रोजीनां सामी आवै। चोरी-दावै चीजां बेचण रो तो स्यात पट्टो ई छुटायोड़ो है।

जिण नौकरी नैं अधम दरजै रो काम मानीज्यो, आज सगळा उणरै लारै पड़ग्या अर उणमें ई सरकारी नौकरी रै, जिणमें अधिकारां सारू ई सावचेती चाईजै, कर्त्तव्य तो दबाव पड़्यां ई निभावणो हुवै। सगळा सरकारी महकमां में घणां चातरग, घणां गुणवान, बुद्धिमान अर जोगता लोग नौकरी लोगेड़ा हुवै क्यूंकै वै नौकरी में भरती होवण री परीक्षा पास करती वेळा मोकळा लोगां नैं लारै छोड़’र ओ मुकाम हासिल करै पण आपां देखां कै सगळा सरकारी महकमां घाटां में चालै अर दूजी कानीं ई छेत्र रा सगळा निजू उपक्रम अणथाग धन कमावै। कारण आपां नै ठाह ई है। लोग चौड़े-चौगान आ कैवै कै म्हारै ड्यूटी पर जावण री जरूरत कोनी पड़ै, अर इण पर नाज़ करै। हकीकत में तो आ बात ढकणी में नाक डूबो’र मरण वाळी है पण बीगड़ी रा किसा बिनायक हुवै।

चौथो अर सगळां सूं माड़ो काम मानीज्यो-भीख। पण आज मोटै सूं छोटो समूचा इण भीख मांगण री आदत सूं न्यारा कोनी। आदत इसी पड़ी है कै मुफत रो धक्को ई छोडै कोनी। मिनख इण फिराक में लागेड़ो रैवै कै कद मौको मिलै अर कद राज अर समाज सूं कीं माँगूं। बियाँ ओ माँगणो ई हड़पणै जिसो है। जियाँ तियाँ ई मुफ़त रो माल हड़पण री जुगत जारी है। बियां मांगणो अधिकार री श्रेणी में भी आवै पण म्हारी निजर में जे आप पूरी ईमानदारी सूं कर्त्तव्य निभाओ अर पछै मांग करो जणां तो ठीक है, नीं तो वा भीख ई है। खैर!

परकत रो कोई ना तो विरोध कर सकै अर ना ई परकत घणा दिनां ताणी सहण करै। आज परकत इण ‘कोरोना’ रै बहानै ई सही पण आपांनैं आपणै मूळ सभाव सूं जोड़ दिया। जिको चिकित्सा महकमों आपरी लालची अर स्वारथी वृत्ति रै पाण लोगां री निंदा रो पात्र बण्यो आज उणमें साक्षात भगवान रा दरसण हुवै। डाॅक्टर, नर्स अर पूरो पेरामेडिकल स्टाफ जिण ईमानदारी अर जिम्मेदारी सूं आज समाज री सेवा करै, हकीकत में वांरो काम ई इण ढंग सूं सेवा-सुश्रूषा करण रो ई है। परकत हेला दे-दे समझावै। ओजूं अनीति धारण मत करज्यो।

खाखी री बात करां। दुनियां में जितरी गाळियां अर भूडी बातां हुवै, बै सगळी पुलिस वाळां सारू काम में लिरीजगी पण आज खाखी वरदी जमराज सूं सामनो मांड’र मानखै री हिफाजत करती निगै आवै। मिनखां री नफरत रातो-रात खतम हुवै अर खाखी री खिदमत में पुसप-बरखा होवण लागै। सावळसर सोचां तो खाखी रो असली काम इण ढाळै रो ई है। परकत ओ संदेसो देवती समझावै। खाखी री खुद्दारी नैं जगावै अर स्वाभिमान रो पाठ पढ़ावै। किणी पीड़ित री पीड़ा रो निवारण करतां उणरी दुआ लेवण सूं बत्तो धन दुनियां में बण्यो ई कोनी।

बिणज-बोपार वाळो काम ‘लाभ’ कमावण रो काम है अर बडेरां री व्यवस्था करेड़ी ही कै लालच तो करो पण कुलालच मत करो। सागै ई आ भी व्यवस्था ही कै ‘जे नदी में पाणी री मात्रा बधण लाग जावै अर घर में रिपिया मोकळा बधेपो पावै तो पछै सजन मिनख रो काम ओ हुवै कै वो वां दोनां (पाणी अर रिपिया) नैं आपरै दोनूं हाथां सूं बारै काढ़ण रो जतन करै। नाव में पाणी री बोहळायत हुयां नाव डूबै अर घर में अनाप-सनाप धन भेळो हुवै तो वो मिनखपणै नैं ले डूबै, इण कारण दान-पुन्न करणो चाईजै। आपां देखां गाम-गाम में मंदिर, देवरा, धरमसाळावां, प्याऊ, सांडसाळा, मुक्तिधाम आद मोकळा कमठाण दान-पुन्न री बदौलत पूरा हुयोड़ा है। काळ-कसूमै गरीबां अर लाचारां री मदद करण रो काम ई बिणज-बोपार वाळा सेठ-साहूकार करता रैया है। पण भामाशाह वाळी अर सेठां वाळी बात तो इण कोरोना वाळी आपदा रै टेम देखण नैं मिली है। लोग आपरी गाढ़ी मैणत सूं कमायोड़ा करोड़ां-करोड़ रिपिया आपदा सूं लड़ण अर मानखो बचावण सारू दान कर दिया। प्रधानमंत्री अर मुख्यमंत्री राहत कोषां में रिपियां री बाढ़ आयगी। टाबरां तकातक आपरा गुलक तोड़’र सार्वजनिक हित में आपरो योगदान देवणो सरू कर दियो। भिखारियाँ तकातक मानवता सारू आपरी झोळी खाली कर दी। मिनखपणै रो ओ असली रूप है, जको आज सामनै आयो है।

सरकारी अधिकारी अर कर्मचारी आज आपरी पूरी ऊर्जा अर जवाबदेही सूं समाज री सेवामें लागेड़ा है। सरकारी नौकरी चौबीस घंटा री हुवै, इण बात नैं सावळसर समझतां रात-दिन अेक कर राख्या है। टरकाऊ टेक्नोलॉजी में उस्ताद हा, वै ई आज मानवता री सेवा में आपरो पूरो योगदान देवण सारू निकळ पड्या। जका लोग सरकारी नौकरां नैं ‘सफेद हाथी’ कैवता बै आज वांनै जंगी-जोधार बतावण ढूका। सरकारी नौकरी नैं ‘पांगळापाळ’ कैवण वाळां री आज जाड़ा चिपगी। बै ई लोग कैवता सुणीजै कै ‘नौकरी सौरी कोनी’। महामारी सूं सामनो मांडण सारू तैयार कर्मचारियां रै घरां मांय सूं कई घरां सूं आवाजां आवै ‘नौकरी न कीजे प्यारा, दूब खोद खाइए’’। बहरहाल!

छेकड़ली बात भीख वाळी, आज मोकळा लोग इसा है, जका समै री मार झेलतां दो टेम री रोटी रा मोहताज हुयोड़ा है पण इणरै बावजूद लोगां रै मन री संवेदनावां जींवती है। समाज सेवी संस्थावां रा वीडियो देखतां सामी आवै कै जद खावण-पीवण री सामग्री बांटण जावै तो भूखा-तिसा लोग आ कैवता सुणीजै कै म्हारै सूं पैली बां बाबाजी नै देओ, बै बूढा है। बेबस लोग भी लुगायां अर बैन-बेटियां रो पूरो सम्मान करता निगै आवै। रोटियां देख’र झपटता अर टूटता कोनी दीखै। ‘भूखा क्या पाप नहीं करता’ इण कैबत नैं झूठी साबित करतां इण भारत रा लोग संतोष धारण करै। ओ संतोष रो सभाव ई मिनख रो मूळ सभाव है। खैर! आयोडी आफत सूं तो लड़णो अर बचणो ई आज रो जुगधरम है। आपां लड़स्यां अर जीतस्यां।

नहचो राखो। ओ कोरोना अेक दिन मिटणो ई है पण ओ मानखै नैं नीं मिटा सकै। आओ! आपां अेकांत में बैठ’र आपणै मूळ सभाव री खोज करां अर उणरै हिसाब सूं आचरण करां। आप-आपरै काम नैं कोरो ‘ना’ देवण री बजाय जे हाथ रो उत्तर ई देवणो सरू करद्यां तो परकत घणी नाराज नीं हुवैली अर इण भांत री आपदावां नीं आवैली। अस्तु!

~~डाॅ. गजादान चारण ‘शक्तिसुत’