देश दशा

गुणसबदी
लाज बिहूणा बणिया, शासन रा सिरताज।
रीत आं तो इण देश री रेटी, खुद री मेटी खाज।।
दशा इण देश री देखो रे, लेवूं इण बात रो लेखो।।१
झूलिया फासी देखलो जोधा, वां री भूलिया बात।
सिटल़ां नै इम देयद्यो शासन, पोल मांही परभात।।२
बल़ गैडी रै बैठिया गादी, इण आजादी ओट।
जन हितां पर आंखियां जोवो, चवड़ै मारै चोट।।३
गाडर ज्यूं ही तल़ै गोडां रै, जन नै दाबै जोय।
धन तो देश रा खायग्या धूरत, चवडै आकड़ो चोय।।४
वोटर नै तो देख बतावै, पाधरी झांसां पोट।
आंखियां बांधनै लेयलै ऐ तो, बीच बजारां वोट।।५
रोल़ पटी रो देखियो रासो, मिनखां झाली मून।
मिलगी आंधै राज रै मांही, सकुन्यां नै घण सून।।६
बुगलै ज्यूं धारणो बांनो, खोलियां चांच मे खोट।
साटै काटै भैंस सल़ू रै, फूल ज्यूं ही मन फोट।।७
लोकतंत्र तो लठ बाजां रो, मत अचंभो मान।
महलां वाल़ा आयनै माडै, छीनलै दीनां छान।।८
जनतंत्र मे आयनै जोवो, मुलक हूवो मजबूत।
मांगता हक सरकार तो मेलै, जबरा माथै जूत।।९
दूसरा काम तो होवणा दोरा, पाधरी दीखै पोल।
ठीक घरां रै सांमनै ठेका, खटकै दीना खोल।।१०
बण बैठा घण देयनै बुत्ता, पोल पटी मे पंच।
घर मांयां बड़ घाल दे ऐ तो, खार रै भेल़ी खच।।११
पंच पंचायती मांयनै पेखो, खांमद रिस्वतखोर।
नकटा बैठा न्याव निवैड़ै, चोवटियै मे चोर।।१२
काढै नी सरपंच तो कोई, आंपणो कारज एक।
पांच वरसां तक मूंगड़ा पीसै, छाती मे कर छेक।।१३
माड़ा हाल ओफिसां रा मानो, धिक धाड़ा रा धाम।
साहब तो बिन सूंक साची, काढणा नाही काम।।१४
बाबुवां री नही लाधवै बातां, जोर नै करलै जेर।
फगडाला नित देवणा फाडी, होवतै काम मे हेर।।१५
रागड़ां तो नित कट नै राखी, सिर रै साटै सीम।
पटवारी तो देखिया पाजी, जारग्या बोडर जीम।।१६
ग्रामसेवक तो गांम मे मल्ला, बी डी ओ रा ई। बाप
खायग्या योजना पूरी खूटल, धीज नही मन धाप।।१७
शिक्षा मैकमै देखलो शाशक, पेख करै प्रयोग।
शंकराचार नै चाणक्य सम, जोय बणै किम जोग।।१८
थाणै वाल़ा देखिया ठाकर, जाल़ मे नाखणा जोर।
जेबकतरां अर जार सूं यारी, चोरड़ा भेल़ा चोर।।१९
बैठ वकील तो न्याय नै बेचै, हर नै करदै हेम।
निज भाषा सूं प्रेम नही है, परभाषा सूं प्रेम।।२०
माल वाल़ा मल गोधिया मांडै, देखो कागजा दीन।
गांम मे हक गरीब रो आं तो, छाकटां लीनो छीन।।२१
साचरो हाजमो दोरो सैणां, करजो मत ना क्रोध।
अणहूती तो एक नही है, सकवी मांडी शोध।।
दशा इण देश री देखो रे, लेवूं किण बात रो लेखौ।।२२

Leave a Reply

Your email address will not be published. Required fields are marked *