🌺दोहा-वंदना🌺

दोहा थानें साधवा, करतो जतन करोड।
रीझ छंद रा-राजवी, कहूं हाथ द्वयजोड॥1
मंतर लय रा मारतो, जागूं निश अर भोर।
दोहा अम पर रीझझै, रे छंदों सिरमोर॥2
दोहा जो थूं हा कहै, तौ लिख दूं कुछ ओर।
पुत्र वरद पिंगळ प्रखर, कविता-काळज-कोर॥3
हिरण मंत्र थूं शाबरी, छंद अनुष्ठुप जेम।
दोहा थारी चाकरी, करणी नरपत- नेम॥4
सुरसत रे गळ माळ रो, दोहौ रतन अमूल।
जख मारै मति जौहरी, कहणौ मनै कबूल॥5
देवळ सुरसत दीपतो, दोहौ दीप अखंड।
जळहळ जळहळ जोत ह्वै, नित -नवरस -नवखंड॥6
शुचि कलम री कर पकड, भर घी साहित भाव।
हवन करूं कागद परां, रीझौ दोहाराव॥7
दोहा स्वाहा थूं स्वधा, विच्चै नमूं विशेस।
रहजो नरपतदान रे, हेले साथ हमेस॥8

~~नरपत दान आसिया “वैतालिक”

Leave a Reply

Your email address will not be published. Required fields are marked *