गांव खांण रे गुंदरे

IMG-20141231-WA0076
गांव खांण रे गुंदरे, बैठी मां बिरदाळ।
आवड आंबलियाळ, जुग जुग जूनी जोगणी॥49
रखवाळी निश दिन करै, कर पकडै किरमाळ।
डोकरडी डाढाळ, गाढाळी गढवी तणी॥50
आया जिण दिन आसिया,लाखणथूंब ज छोड।
आवड मढ थाप्यौ उ दिन,कर कर मन मँह कोड॥51
तण आवड तरशूळ री,अणी अडी आकास।
वाहै करण विनाश,अरियां दळ बळ ऊपरां॥52
अंबा भुजलंबा अजब,अवनी थंभा आइ।
जगदंबा झेले रही,आवड मां अखिलाइ॥53
इण आवड ऊछेरिया,बाळक घण बडबोल।
आवै कुण इण तोल,मात समोवड मात है॥54
डमरु डाक डमालिनी,डाकण शाकण देव।
आवड तूं ज अभेव,तखत विराजी तेमडै॥55
बिरदाळी बाळीह, डोकर डाढाळी तथा।
भोळी मैं भाळीह, रखवाळी करती रहै॥56
खळके रगतां खाळ, आवड जद वाहै खडग।
डोकर औ डाढाळ, हणवा तेमड हूण नें॥57
प्याला शोणित पूर, भर भर खपर डकारणी।
करडी घणी करूर, आवड खळ रे ऊपरां॥58
पल भखणी चखणी सुरा, दळणी दुष्ट करूर।
आवड रखणी पत सुकव, जोगण जग मशहूर॥59
समद हाकडो सोखणी,वरद जगत विख्यात।
मां आवड जग-मात,वसुधा मांय विराट वपु॥60
शोणित लसित शरीर, दळिया बावन दैत जद।
वड आवड रणवीर, बावन भेरु री बहन॥61
केहरियो डणकेह, तरशूळाळी ताहरो।
जाणक घन गरजेह,गाढै अंबर गजब रो॥62
ठम ठम ठमकत पाय,झम झम झम पग झांझरां।
घम घम घुंघर थाय, छम छम आवड रास ले॥63
गजब करे मां गश्त, जबरदस्त जग राखवा।
हालै जिम गज मस्त,पस्त हौसला व्है पिसण।64

“आवड आखै आसिया” सूं

Leave a Reply

Your email address will not be published. Required fields are marked *