गीत मथाणियाराय रो

।।दूहा।।
पहर एक प्रभात रा, अमर रूकूंली आंण।
प्रण पूरै प्रमेश्वरी, मरूधर नगर मथांण।।
आई राखै आज तक, मह वचनां रो मांण।
राजै पहर प्रभात रा, मरूधर नगर मथांण।।
मोटो कीधो मेहजा, पात परै रख पांण।
इल़ साखी अमरेस री, मरूधर नगर मथांण।।
चाखड़ियाँ निज चाव सूँ, जगदंब राखी जांण।
साजै ज्यारी सेवनां, मरूधर नगर मथांण।।
अमर करी अरदास तद, जद आई जोधांण।
वल़तां पग कीधो विमल, मरूधर नगर मथांण।।

।।गीत मथाणियाराय रो।।
।।गीत।।
अमर दूदहर आवियो तेड़वा ईसरी,
मया कर जोध पर आज माता।
सार कर रिड़ै-तण काज गढ सारजै,
निजर भर इमी री पाल़ नाता।।1

जोध रो गुमर लख हिये में जोगेसर,
छाड मन धीर गंभीर छिड़ियो।
सापियो नाथ पत मंडोवर सांप्रत,
चहूंवल प्रसिद्ध जग नाथ-चिड़ियो।।2

अहर में जिती भां चीणिजै जगै ऊ,
भींत वा रात री धूड़ भेल़ी।
जोध मन संकियो साच मन जामणी,
अकल बिन मेहणत जाय ऐल़ी।।3

आप बिन दूसरो अबै नह उबारण,
जगत दध डूबती नाव झालो।
कमध री बधारण इल़ा मझ कीरती,
हाथ सूं दिरावण नींव हालो।।4

अरज सुण अमर री चढी रथ अंबका,
थंभका कीरती थपण ठावा।
पूग धर मंडोवर रीत धिन पोखणी,
चंडका प्रवाड़ा प्रिथी चावा।।5

सुकर थप नींव गढ-जोध री शंकरी,
दुआई आपरी प्रतख दीधी।
कुमख्या नाथ री मिटा कर करनला,
कमध री विपत्ति दूर कीधी।।6

पनर पनरोतरै मोरधज प्रिथी पर,
हरस कर ईसरी थप्यो हाथां।
जोधपुर आपरी दया सूं जोगणी,
वडम री वरी धिन किती बातां।।

थिरै रो थिरावस उणी पुल़ थापियो,
आपियो आपरो वरद आई।
जदै ई अमर जस तिहाल़ो जापियो,
वरद मुझ सीस राख अबै बाई।।8

महर कर मथांणै आई जद मावड़ी,
अमर घर सकल़ गल्ल करण आछी।
तांबापत्र चाखड़ां राखियो तल़ै दे,
बात विखियात जग सरब बाची।।9

पहर इक ठंभूली पात परभात रा,
अवन त्रिलोक सूं ऐथ आंणै।
वचन नह पल़टसी दिया जो बीसहथ,
जुगोजुग वचन ऐ साच जांणै।।10

कैर करनी तणो खड़ो छै कलपतर,
धणी-थल़ तणी वा थपी धारा।
मथांणै नगर री आब इणसूं मनो,
सेवियां मनोरथ पूर सारा।।11

जपै कव गीधियो सुजस जग जामणी,
केहड़ी जेहड़ी करै कांनै।
जोड़कल़ दिसा मत जोवजै जाहरां,
मावड़ी अरज मुझ तुंही मांनै।।12

~~गिरधरदान रतनू “दासोड़ी”