माँ करणी गीत – वैळिया साणौर

🌹गीत वैळिया साणौर🌹
18-15, 16-15
बाकी सब 16-15
आदि गुरू -अंत लघु ।

कीरत मया किंनयाणी करनल, सुमिरन करतां आय सहाय ।
विङद राखजो मां वरदायक, गिधियो गीत तिहारा गाय ।।

पूजां जोङ पांण परभाते, निमतो सीस तिहारो नाम ।
धाम धरा पर धवळ धजाळो, गढ दिखतो देसाणै गाम ।।

आव मात हर पीङ उताळी, चिरताळी आवै चामंड ।
खपराळी मां भर-भर खप्पर, दैत वंश नै देती दंड ।।

हेले माथे लगे हाजरी, कुण ऐङो करुणा किरतार ।
चरण शरण दे राखे चाकर, अंब तणों बस ऐक अधार ।।

साद कूप अणदे री सुणली, तै ही नाव बणिये तारी ।
शेखे री मां हुई सहायक, तूं अरधंगी त्रिपुरारी ।।

मेटत कळह कल्पना मन री, तन री हर व्याधी टळतीह ।
लोहङयाळ तणी हिंय लागी, जोत अंधारै मन जळतीह ।।

तीरथ च्यार कियां तिर जावै, चौसठ धाम करो भल चाय ।
मढ देसांणै मात विराजत, आखो जगत धोकबा आय ।।

थें अवतार धरा नित थपिया, जग रै हित परचा जगतंब ।
आई लोक मांय अवतरणी, विखमी बार करी न विलंब ।।

मूरख हूं अगयान मावङी, वाणी में नाही विस्तार ।
परवाङा थारा गिण पाऊं, हँसवाहनी कंठ पधार ।।

कीजो अरज सुणे मां किरपा, सत पथ माथे रहजो साथ ।
मन री मेट मलिनता मायङ, हर दुख हरै आपरो हाथ ।।

ऐक अरज सुण म्हारी अंबे, आप दियो सो ही अणपार ।
लाज राखजो मां नवलाखां, सुण इतरी करजो स्वीकार ।।

~~गिरधारी दान बारहठ (रामपुरिया)  कृत

Leave a Reply

Your email address will not be published. Required fields are marked *