केसरिया बालम कहूं

केसरिया बालम कहूं, गाढा माढां राग।
आवो घर अलबेलडा, उपजावण अनुराग॥1

केसरिया बालम कहूं, जळूं बिरह री झाळ।
आव अषाढी मेह जिम, (तो) भींजूं इण बरसाळ॥2

केसरिया बालम कहूं,नेह निभाज्यो नाह।
आय मिळो म्हाने अठे,गाढ भरण गळबांह॥3

केसरिया बालम कहूं,गाढ गुलाबी रंग।
इण तन चंदण रूंखडै,लिपट्या विरह भुजंग॥4

केसरिया बालम कहूं,किण ने मन री पीर।

बिरह बांस रो रूंखडो,निकळ्यौ छाती चीर॥5

केसरिया बालम कहूं, किम बिसरिया कंत।
निसरिया आंसूं नयण,(जिण)हरिया वन दरसंत॥6

केसरिया बालम कहूं,गाढा रंग गुलाब।
देखत तौ सुख ऊपजै,सुंघत नशो शराब॥7

केसरिया बालम जदी, ताण्यां निजरां तीर।
उण दिन सूं बीमार हूं, (भल) साजो दिखै शरीर॥8

~~नरपत आसिया “वैतालिक”

 

Leave a Reply

Your email address will not be published. Required fields are marked *