ख्यात आईनाथ री अनोपो वखाणे-अनोप जी वीठू

आवडजी रो अनोप जी वीठूरो बणायोडो गीत। इण गीत रे मांयने “आवडजी हाकडो शोषियो” उण घटना रो चारणी शैली मै अद्भुत वर्णन करियो है।

श्री सुरसती गणपति वृहसपति शारदा,उकति सम्मपो अन्नदाता।
सापतातम्म री वारता सुणावां,मोतीवाळी हुई जगत माता॥1

हेमाळा पहाड सुं निसरे हालतो,गळियोडा बरफ रो नीर गोटो।
हिंद अर सिन्ध रै बीच मंह होयनै,मोतियां भरोडो पेट मोटो॥2

तिब्बत कम्बोज सुं उतरे ताकडो,हाकडो नांम दरियाव हाले।
घिरोळा देवतो बण्यो घण घमंडी,रतन रतनाकरो मांय राळै॥3

रुकावट करि वां पयोहर रातरी,मात री हथाळी हुई मोटी।
आईनाथ रो पेट अगस्त जिम उपस्यो,छोळ महादध तणी हुई छोटी॥4

पीयो दरियाव जद हाकडो पेट मंह,चिलकियो रेत मह नेठ चोखो।
ओकळी मांयनां सीप दळ उघड्या,मोतीयां चुगण रो दियो मोको॥5

मांहणों लाहणों किया ढग मोतियां,धोबियां मोतियां भर्या धोबा।
मोतेसरां मणयारां सोनारां माळियां,खत्रियां मोतियां भर्या खोबा॥6

थहे भरे छत्रियां मोतियां थोकडै,चारणाँ खुरजिया भर्या चाळी।
गूजरां रबारी लिया कर गांठडां,ब्राहमणां वाणिया पालीवाळी॥7

बाइयां मोतियां लिया भर बुगचां,महेरखे थैलियां भर्या मणका।
रेजगी दाम आरामसूं गरीबां,कोडियां ओडियां भर्या टबका॥8

कीर आहीर सिरव्वियां कायथां,मोतीसरां रावळां गळे माळा।
किसबीयां मिंयां सब लिया भर कोथळा,पोटकां बांध अर वहे पाळा॥9

आई अगवाण हुय संचरी आखती,पाखती तपोबळ हांक पाडी।
मारग निरभय हुओ बुआके मउवडो,मोती उछाळती वहे माडी॥10

हंस त्रपता करे गुजरे हारडा,रायकां गायकां अहिराणै।
गीत गुण गावतै आवतां गायकां,थिरणे रायकां कायथांणै॥11

चंवर ढुळावता वहंता चारणाँ,छत्रियांणी करे छत्रछाया।
आवडां आवडी वा वडी आवतां,माढधर पधारी जोगमाया॥12

राह बुहारतां चले अग राजवी,पदम मंडता कदम वहे पाळा।
मोतियां सटे नां मोतियां अराधै,आणियो मेह सुगाळ आळा॥13

अंद्र भगवाननां मोतियां अराधै,आणियो मेह सुगाळ आगां।
कैक चूंधी वळे नदियाँ खळक्कै, लौद्रवपुर नग्गरे हुआ लागां॥14

वधाई मोतियां थाळ भर वोकळा,तुंह संभाळ दे माळ तूठां।
बाळ खूंजां भरे मोतियां बोहळा,महेळ खोळा भरे वीर मुंठां॥15

सांमियां बजाया दुंदुभि शंखडा,झाटकै मोतीयां भरी झोळी।
बैठिया शेठीया हुआ मोती विणज,ताकडै मोतीयां दिये तोळी॥16

हेम हेडाउ पोठां भरे हालियो,वेहंतां मोतीयां धार वाही।
किताइक पिरोया रुंखडां कंटकां,छांटणां मोतीयां माढ छाही॥17

खणिगया मोती खाडाळ राखाडिया,छांणणां छाजणां भरे छांने।
वीसरी मोतियां भराणी बोरियां,ऊंठ लद कतारां घरे आंणे॥18

काशमीर मारवाड पंजाब कच्छ सिन्धतक,घुमरां वेहि वळ नदी घाटां।
बीणीयां मोतीयां घणी बिणजारियां,भर्योडी बाळधां बहे वाटां॥19

मोतीयां खरीदयो वियो गामेतीयां,धांन धींणां घणा देश धाप्या।
घरोघर सुमंगळ ढोल बाजा धुरै,थांन आईनाथ रा मांन थाप्या॥20

राम क्रोडीधज कियो एक विभीषण,करण क्रोडीधज किया कांई।
श्री कृष्ण क्रोडीधज कियो एक सुदामा,असंख्य क्रोडीधज आप किया आई॥21

मामडा तातरी मोहवती मातरी,महिरखे भ्रात री जात मारु।
ख्यात आईनाथ री अनोपो वखाणे,सुणीजै पुराणी वात सारु॥22

Leave a Reply

Your email address will not be published. Required fields are marked *