मां मोगल मछराळ
वरदे वीणा वादनी, बसजै ह्रदय विशाळ।
कीरत आई री कथूं, मां मोगल मछराळ।।१
समद समीपां सोहती, बीस भुजी विकराळ।
तनें नमन तारण तरण, मां मोगल मछराळ।।२
ओखा री आणंद घन, वंदन बीस भुजाळ।
सबळ निबळ री स्वामिनी, मां मोगल मछराळ।।३
साद सुणंता शंकरी, तीजी आवै ताळ।
झटप बाज जिम जोगणी, मां मोगल मछराळ।।४
जबरी खबरी जोगणी, सब री रखै सँभाळ।
राणेसर री डोकरी, मां मोगल मछराळ।।५
कियो सरप रो कोरडो, कसी हाथ किरमाळ।
जबर दस्त है जोगणी, मां मोगल मछराळ।।६
सांचै मन सूं सेवियां, व्है ना वंको बाल।
वाहर वीदग री वदां, मां मोगल मछराळ।।७
डाढाळी थूं डोकरी, माता वळै मुँछाळ।
सरळ ह्रदय री स्वामिनी, मां मोगल मछराळ।।८
फेफड खल दळ फाडणी, डणकंती डाढाळ।
सोरठ धर बैठी सुभग, मां मोगल मछराळ।।९
मैं मति मँद ममतामयी, नयणां नेह निहाळ।
बाळक री थूं बाळ कर, मां मोगल मछराळ।।१०
धांधणिया देवसुर धी, ओखा धर उजवाळ।
प्रगटी चारण पोखणी, मां मोगल मछराळ।।११
निहचै काळी नागणी, फूंफाडै भर फाळ।
काळ झाळ क्रोधित बणे, मां मोगल मछराळ।।१२
आई थारी आग री, जिणने लागी झाळ।
उणरो न को रणी धणी, मां मोगल मछराळ।।१३
छपन क्रोड चामुंड अर, नवलख री नेजाळ।
आई तूं अगवाण है, मां मोगल मछराळ।।१४
आई पकडी आपरी, चारण बाळक चाळ।
दायी -वर, देवां मणी, मां मोगल मछराळ।।१५
भाळ लेवती भगत री, दिल री घणी दयाळ।
मूंघी घण ममताळवी, मां मोगल मछराळ।।१६
डणकी डूंगर गाळिये, बाघ बणै बिकराळ।
गरब असुर रा गंजवा, मां मोगल मछराळ।।१७
नेह मयी राखै नजर, नरपत थारो बाळ।
रोस ह्रदय राखै मती, मां मोगल मछराळ।।१८
आई म्हानै यूं मिळी, धातां ने जिम ढाळ।
काम सरळ करिया सभी, मां मोगल मछराळ।।१९
दरसण परसण देव किय, अंतस ह्वै अजवाळ।
मन आंगण री है मिहिर, मां मोगल मछराळ।।२०
कुण थारी समवड करे, वडहथ वडथड वाळ।
जळ थळ पातळ सब बसी, मां मोगल मछराळ।।२१
जेडो तेडो आप रो, बड बोलो पण बाळ।
अवगुण मन मत आंणजे, मां मोगल मछराळ।।२२
नटखट नरपत दान तूं, करडी पण करुणाळ।
सदा स्नेह मय सुरसरि, मां मोगल मछराळ।।२३
दूर पंथ, दरसण विकट, सुपनै आय सँभाळ।
औ इज बिनती आपने, मां मोगल मछराळ।।२४
नेह झडी बरसावजै, जिम जळहर बरसाळ।
भवा चहूं नित भींजणो, मां मोगल मछराळ।।२५
गढवी नरपतदान रे, गरज घणी गाढाळ।
बाळक नें मत बीसरै, मां मोगल मछराळ।।२६
तावड बळता तनय रे, छांव करण छतराळ।
घांघणियाणी घण गुणी, मां मोगल मछराळ।।२७
सोरठ रो थूं सेवरो, गुरजर धर गळमाळ।
रतन कही रजथान री, मां मोगल मछराळ।।२८
अखै पात्र ईहग तणी, पुहमी री प्रतपाळ।
ब्रह्मंडा भांडोदरी, मां मोगल मछराळ।।२९
पंछी नरपत आसिया, बैठौ है तव डाळ।
मती उडाडै मावडी, मां मोगल मछराळ।।३०
चाळकना री चारणी, जोगण जूनी जाळ।
तूं आवड तूं करनला, मां मोगल मछराळ।।३१
जबडां सूं जमराज रे, लावै पाछा वाळ।
प्राण बचावै पात रा, मां मोगल मछराळ।।३२
छपन क्रोड चामुंड अर, ले भैरव लटियाळ।
नरपत री नित वाहरू, मां मोगल मछराळ।।३३
नवलख सँग मां नीसरी, डरिया दस दिगपाळ।
जबर रासडै थूं जमीं, मां मोगल मछराळ।।३४
जोगण झुंड जगावणी, दैत मार डाढाळ।
बिन बाढाळी वा लडै, मां मोगल मछराळ।।३५
साद सुणै जद शंकरी, डमरू डाक डमाल।
आळस मरडै ऊठती, मां मोगल मछराळ।।३६
क्रोध भरी करडी निजर, वळै हाथ में व्याल।
हाकल करती अरि परां, मां मोगल मछराळ।।३७
कर कंकण सोहै कनक, गळ विच हीरक माळ।
कोर जरी वपु कांचळी, मां मोगल मछराळ।।३८
सोहै सिर पर भेळियो, कुंडळ कान कृपाळ।
आड सिंदूरी माथ पर, मां मोगल मछराळ।।३९
हेतां हींडो घालियो, दिल बडला री डाळ।
झूलो! बाळ झुलावतो, मां मोगल मछराळ।।४०
दीसै छिण में शोडसी, छिण फिर बूढी बाळ।
नित नित नव लीलामयी, मां मोगल मछराळ।।४१
मन बुगलो मांने नही, बैठौ तिरसो पाळ।
मानस-सर नी ओळखी, मां मोगल मछराळ।।४२
रसना पर रम कवित बण, रस-नव उकती रसाळ।
छंद नाद धुनि साम री, मां मोगल मछराळ।।४३
आई सांचौ आसरो, लज रख लोवडवाळ।
जामण जाई जोगणी, मां मोगल मछराळ।।४४
अतलस कापड आप रे, भली भेळियावाळ।
आँजण सुरमो आँख विच, मां मोगल मछराळ।।४५
बिन बोलायां बाळ री, रहती सदा रुखाळ।
जाणी वरदानी जगत, मां मोगल मछराळ।।४६
रूपां रे घट में रही, वट सजाण री वाळ।
मोटी रा मन री कही, मां मोगल मछराळ।।४७
राजल तन राची रही, जबर मात जोराळ।
अलग नाम पण एक है, मां मोगल मछराळ।।४८
मन री मोटी मावडी, तन री वळ तेजाळ।
जन जन री मां जोगणी, मां मोगल मछराळ।।४९
राज काज सुख साज री, राज आ ज रखवाळ।
लाज राख दुख भांज दे, मां मोगल मछराळ।।५०
बाळ भाळ रखवाळजे, टाळ जाळ जंजाळ।
वाळ विघन जबराळ तूं, मां मोगल मछराळ।।५१
काळ झाळ बण काळ पर, (कर)बाळ बाळ रखवाळ।
व्याल -वाळ जगजाळ हर, मां मोगल मछराळ।।५२
झट पट कट कट विकट घट, नटखट नरपत बाळ।
परगट घट घट चारणी, मां मोगल मछराळ।।५३
हेठै सगत बिराजिया, भलो ज नींमडो भाळ।
गोरवियाळा गांव में, मां मोगल मछराळ।।५४
करुणानिधि करुणाळ है, हिय री घण हेताळ।
कर किरमाळ ‘र है उरग, मां मोगल मछराळ।।५५
दैत हणण जमडाढ है, गढवी री गाढाळ।
डाढाळी बिकराळ बहु, मां मोगल मछराळ।।५६
आई मंदिर आपरे, जूनी जाजम ढाळ।
बैठ बाळ बिरदावता, मां मोगल मछराळ।।५७
जोगण चारण जात री, रहिजो सदा रुखाळ।
अरज आप नें है इती, मां मोगल मछराळ।।५८
डिंगळ वन में रात दिन, डणकै दो डाढाळ।
देशाणा री डोकरी, (अर)मां मोगल मछराळ।।५९
भळळळ कुंडळ भळकता, झळळ हार गळवाळ।
कर कंकण खनन खनन, मां मोगल मछराळ।।६०
डणकै डाढाळा जठै, मोटा माथा वाळ।
बैठी धर मां गीर बिच, मां मोगल मछराळ।।६१
डणकंता डाढाळ पर, सदा पलांठी वाळ।
बैठी है मां बीसहथ, मां मोगल मछराळ।।६२
गुण थारा कथवा तथा, चरित लिखण चरिताळ।
अनत सबद ओछा पडै, मां मोगल मछराळ।।६३
वपु काळी बिरदाळ तूं, मुंडन नर गळ माळ।
दळ भर खपर डकारणी, मां मोगल मछराळ।।६४
रुम झुम रथडै नीसरी, घम घम घुंघरवाळ।
दीठी लेवत रासडो, मां मोगल मछराळ।।६५
छपन क्रोड नवलाख सँग, चौरासी चरिताळ।
रमें रास नवरात में, मां मोगल मछराळ।।६६
ढोल बजै तुरही बजै, बजै बेणु सुर वाळ।
रमें मात नवरात में, मां मोगल मछराळ।।६७
लथ बथ हुय लडबा लगी, दैत दळण डाढाळ।
वाहर चारण कज सगत, मां मोगल मछराळ।।६८
मीठ दीठ माता तणी, मिळी नीठ ममताळ।
पीठ सगत परमेसरी, मां मोगल मछराळ।।६९
पाको तेल फुलेल पट, लखी ललित लटकाळ।
डाक डमालं रंजणी, मां मोगल मछराळ।।७०
सोव्रन सूरज ऊगियौ, आभा विच अरुणाळ।
जागोनी जगदंबिका, मां मोगल मछराळ।।७१
घमर बिलोवण गूंजता, मही मांखण मधुराळ।
जागो जागो जोगणी, मां मोगल मछराळ।।७२
गायां हाली गूंदरै, गळ मँह धुंघरमाळ।
प्रोढ हुई जागो परा, मां मोगल मछराळ।।७३
लेयर धीणा हालिया, गाय तणा गोवाळ।
ऊठौ मां अवनी -तणी, मां मोगल मछराळ।।७४
गावूं गोरवियाळियां!, चिरज राज चरिताळ।
आळस मरडै ऊठजो, मां मोगल मछराळ।।७५
दीप जोत थानक करूं, ले हथ सुवरण थाळ।
उतरे मढ में आरती, मां मोगल मछराळ।।७६
धूप दीप धमरोळ वळ, थाय लापसी थाळ।
जोगण जीमै जतन सूं, मां मोगल मछराळ।।७७
सुवरण कळस थपावियो, जूनी जाजम ढाळ।
बोलावां बाई थनें मां मोगल मछराळ।।७८
तरवाडो व्होरावियो, भलो ज शुभ दिन भाळ।
परमेसरी पधारजो, मां मोगल मछराळ।।७९
महिला सब आंगण मिळी, चिरज कथण चरिताळ।
आई रमवा आवजो, मां मोगल मछराळ।।८०
पाको तेल फुलेल पट, सुरमो सांधण वाळ।
धांधणियाणी धारियो, मां मोगल मछराळ।।८१
कापड काळी लाइ रो, घाघर धेरा वाळ।
कमर कसावो कांचळी, मां मोगल मछराळ।।८२
हेम तणी गळ हांसली, कुम कुम सिंदुर भाल।
कानां कुंडळ ओपता, मां मोगल मछराळ।।८३
नकबेसर, नथ नाक में, कनक टीको कपाळ।
रमजो पहरै रात रा, मां मोगल मछराळ।।८४
सेंथा बिच सिंदुर शुभ, लटां वासुकी व्याल।
नवलख सँग मां नीसरी, मां मोगल मछराळ।।८५
बाजू बँध दुय बाँह में, वळ आंगळ वेढाळ।
सह नवलख ले रासडो, मां मोगल मछराळ।।८६
पग मँह बिछिया पहरिया, कडलां पग कनकाळ।
झांझर पग में झणकता, मां मोगल मछराळ।।८७
सजिया शुभ शिणगार मां, नरपत रहै निहाळ।
उदो उदो उचरत रहूं, मां मोगल मछराळ।।८८
गरबो गहियो हाथ में, धिन धिन धाबळवाळ।
रास रमत नवरात में, मां मोगल मछराळ।।८९
नेस अमीणै राखजे, कुशल खेम करुणाळ।
औ ज अरज है आप ने, मां मोगल मछराळ।।९०
भूल माफ करजे भवा, बडबोलो हूं बाळ।
आप तणे हूं आसरे, मां मोगल मछराळ।।९१
डिंगळ डाळां फैलसी, जिम छाया वडवाळ।
जो सींचेला जोगणी, मां मोगल मछराळ।।९२
जाळां डिंगळ जामसी, गाढी वळे घटाळ।
सांची जोगण सींचसी, मां मोगल मछराळ।।९३
सर डिंगळ नी सूखसी, आसी अठै मराळ।
बणै नदी निस दिन मिळै, मां मोगल मछराळ।।९४
डिंगळ आंबो म्हौरसी, लगसी साख रसाळ।
रखवाळक इण रा रहै, मां मोगल मछराळ।।९५
डिंगळ वन री डोकरी, रहजे बस रखवाळ।
सदा बणे थूं सुरसती, मां मोगल मछराळ।।९६
डिंगळ पाछी लावजै, पूगी भलै पताळ।
सबरी अरजी सांभळे, मां मोगल मछराळ।।९७
डिंगळ ने डणकारवा, नवलख छोड फणाळ।
छपन क्रोड चामुंड सह, मां मोगल मछराळ।।९८
अडग भरोसे आप रे, बैठा चारण बाळ।
डिंगळ फिर डणकारसी, मां मोगल मछराळ।।९९
डिंगळ री डणकार में, कवियों रो नी काळ।
रोज नवा पैदा करै, मां मोगल मछराळ।।१००
रांणेसर री राजवी, भगुडा तण भूपाळ।
भीमराणै भय भंजणि, मां मोगल मछराळ।।१०१
बिन ताळां कूंची बिना, घर घर री रखवाळ।
देखो भगुडै दीपती, मां मोगल मछराळ।।१०२
परतख मैं पेखी नही, रहती पण रखवाळ।
अंब अगोचर अहरनिस, मां मोगल मछराळ।।१०३
सरस भाव मय वंदना, बाई तव बिरदाळ।
बाळक आज बणायदी, मां मोगल मछराळ।।१०४
कडियां लडियां पोयली, दमकत दोहा वाळ।
अरपण अंबा आप नें, मां मोगल मछराळ।।१०५
जेडी तेडी जोड दी, आ खर आखर माळ।
लेस दोस लखजै मती, मां मोगल मछराळ।।१०६
शबद और नी सांपडै, चरज लिखण चरिताळ।
किंकर हूं कीकर कथूं, मां मोगल मछराळ।।१०७
पोंतरजै मत पात नें, रहिजै सदा रुखाळ।
मांगूं औ बस मावडी, मां मोगल मछराळ।।१०८
माळा नरपत मांड दी, शत अठ दोहा वाळ।
सादर मां स्वीकारजे मां मोगल मछराळ।।१०९।
एक सो आठ मनको की यह माला सुमेरु मनके के साथ मां मोगल के श्री चरणों मैं सादर समर्पित।
~~नरपत आसिया “वैतालिक”
