मांझल रात अमोल-वैतालिक

सौ कोसां साजन बसे, पूगावै उण पोळ।

सुपना वाळ सुहामणी, मांझल रात अमोल॥1

बालम तौ जालम घणौ, करतौ टाळम टौळ।

(पण) सुपने सजण मिलावती, मांझल रात अमोल॥2

इक चंदौ आकाश में, दूजौ रंग रे म्हौल।

झिल मिल झिल मिल जोसना, मांझल रात अमोल॥3

साजण आयां हे सखी, पलकां हंदी पौळ।

तारा निछरावळ करै,मांझल रात अमोल॥4

रुण झुण रुण झुण बाजती, झींगर री रमझोळ।

हीरक तारक चीरमय, मांझल रात अमोल॥5

विरह मिलन भेळा रखै ,आवै कुण इण तौल।

दुःख सुख दोनूं दाखणी, मांझल रात अमोल॥6

नखराळी काळी तथा , हिय जिण हेत हिलोळ।

ताराळी भाळी सखी, मांझल रात अमोल॥7

नरपत चहै निहाळणौ, घट घूंघट पट खौल।

मन नें अब तिरसा मती, मांझल रात अमोल॥8

 

~~नरपत आवडदान आसिया “वैतालिक”

 

One comment

Leave a Reply to Kiran Cancel reply

Your email address will not be published. Required fields are marked *