मो पर करो कृपा करनेल – चिरजा

मो पर करो कृपा करनेल कृपानिधि, मात मेहाई ए।
मात मेहाई ए दयानिधि, मां महमाई ए।
मो पर करो कृपा करनेल कृपानिधि, मात मेहाई ए।। टेर।।

सुत कै और सहारो नांही, सुण सुरराई ए
एक तुंही आधार अंबिका, मां वरदाई ए
मो पर करो कृपा करनेल कृपानिधि, मात मेहाई ए।। 01।।

करुणा-उदध नाम किनियाणी, बिड़द बडाई ए
करुणा धार कृपा कर करणी, हेलै आई ए
मो पर करो कृपा करनेल कृपानिधि, मात मेहाई ए।। 02।।

सेख-नार सिमर्या संकट में, उण पुळ आई ए
तोड़ताड़ बेड़्यां तुरकाणी, जेळ छुड़ाई ए
मो पर करो कृपा करनेल कृपानिधि, मात मेहाई ए।। 03।।

काढण हित बेड़ो झगडू को, बांह बधाई ए।
सुरभी दूध काढतां सगती, करी सहाई ए।
मो पर करो कृपा करनेल कृपानिधि, मात मेहाई ए।। 04।।

कान्ह तणी रोकण कुटळाई, कार कढ़ाई ए।
मानी ना संकळाई मूरख, मौत बुलाई ए।
मो पर करो कृपा करनेल कृपानिधि, मात मेहाई ए।। 05।।

लड़ी जाय जम रै लश्कर सूं, लाखण ल्याई ए।
देपावत नहं जा जमद्वारै, कोल कराई ए।
मो पर करो कृपा करनेल कृपानिधि, मात मेहाई ए।। 06।।

बरत कूप पड़ती बिरियां मां, अणंदै ध्याई ए
दोय मुखी अहि बणी दयाळू, सांध दिराई ए
मो पर करो कृपा करनेल कृपानिधि, मात मेहाई ए।। 07।।

जंग में जाय जुटी जेता हित, मुगल मराई ए।
रिड़मल हित मुरधर तैं राखी, साख सवाई ए।
मो पर करो कृपा करनेल कृपानिधि, मात मेहाई ए।। 08।।

गुणियण सुत गजराज तणी मां, लाज रखाई ए
दूर राख दुष्टां नैं देवी, सजन मिलाई ए
मो पर करो कृपा करनेल कृपानिधि, मात मेहाई ए।। 09।।

~~डॉ गजादान चारण ‘शक्तिसुत’