पाबू प्रशंसा – कवि स्व. भंवर दान जी, स्व.अनौपदान जी झणकली कृत

Pabuji।।गीत सपाखरौ।।

दैवलौक सुं उतरी एला, हीसती वाजींद दैख ।
धायौ खींची जींधराव, मीशणा रा द्वार।
हैवरी रै मौल रौकङा, धाम्या कै हजार ।
एहंगा नाकार सुणै रूठियौ अपार……. 1

घणै मान धांधलौत पधारै दैवला धरै ।
पाधरै पालौ सूढंग मांगी है पवंग ।
भवीनी दाखीया वैण सांभळै धर्म री भाई ।
समापां तुरंग साई सफाई सजंग…… 2

वाहरू धैना रौ वणै वैहता चाहलां बीच ।
अवैळौ सांभलै हैलौ आवजै अतालं ।
सुणै हाल जीध माल तौभ झाल हुवौ शत्रु ।
बाधीयौ पाल सू वैर शौहलां विचाल …..3

प्रिणवा हालीयौ पाबू कालवी चढै कैकाण ।
जांन रै मंडाण जाझा भूपती सुजाण ।
छहौ राग छतीसौ रागीणीयौ रा धौरा छूटा ।
इन्द्र धारां निछालां छावियौ अमरण…….. 4

हीण भांण हौय खीची माधणां रौ माल हैर्यौ ।
त्राहि त्राहि त्राहि मांम फूटी वैण काल ।
कैवी शाल भाळाळै नां कीधी शाल दैव कन्या ।
धैन री पुकार सुणै चांवरी विचाल…… 5

तीजै फैरै प्रींत तौङ जूझवा री नीत जौङ ।
महावीर मूंछा मौङ उठीया अरौङ ।
औनियारा करैवा सौढांण रा सपूत आया ।
रती भार प्रतीक्षा नी चूकीयौ राठौङ……. 6.

संभाली पाङौस साथ हैक सौ चालीस सूरां ।
संभ्यौ रजनीश वंशी मांडवा संग्राम ।
दैवीया नभाङै शीश बजाङै निशांणा डंका ।
सांमठा बज्र का धकां साभिया लगाम …….7

हालीया अठौर जौर बाजी धौर डंडा हंडा ।
बांगङा नडां सक्रौध रांगङा बाकार ।
धरा धमकाई पौडां हौङ लागौ धङा धंग ।
सजौङा धौङा सपीठ झांगङु सवार……… 8

उगतै आदीत श्रंगा रसम्या पसारी एम ।
आजौङा छङाला अणी छावियौ उजास ।
ताकतां गैतूळ शूळ तंठा धैना ढूल तजै ।
हाकिया विडंग हौय जायलां हतास………. 9

पूगिया वाहरू जुङी फौज पातां दौहू पार ।
हौकारां वाजींद्रा हींस माची हाक जाक ।
जायलां कटक्क सामा बै धङक्क भील जुङया ।
झींक झाक खागां बागां गैदाळा झटाक……. 10

शक्तया संम्या कंठीर सांभळै सीधुवौ राग ।
शाबळां झूलरा क्रबा दौयणां संहार ।
चाली श्रौण झार आर जौगणी डकार चाली ।
बारंबार पिनाकां टंकार बैसूमार………..11

धूतारी धजारां धकां धमां धमां हौण धारी ।
विदारी वितूंङां तूंडा कै खंडा व णंत ।
चौला चख पंखा वाली नखां भखां लैह चाली ।
झाली झौली महा काली कपाली झलंत….. 12

कौरवां बैराठ बीच धैनका हैराण करी ।
एम जींधराव गाया लै जातौ अनींत ।
पारथू जताप पाबू सूरमी छूङाय पाछी ।
जौङै घमशांण छत्री हुवौ शत्रु जीत…….. 13

बाजूआं पसारै सगा साला बहनौई बनै ।
भिङया द्रौण अभिमन्यू जैम भुजा डंड ।
प्रण काज कर्ण ज्यू आराण बीच तजै प्राण ।
पौढियौ गंगैव सया जूझांरा प्रचंड……… 14

शैला रां वंदै हजूर दैवलौक पूगौ शूर ।
भागतौ अरातां भीङ जीतनै भारात ।
धनौ धनौ कमधजां वंश कैतु धनंकार ।
भंवरू अनौपदान कहै दौनौ भ्रात
दैवलौक सूं उतरी एला हींसती वाजींद दैख……… 15

~~कवि भंवरदान जी, अनौपदान जी झणकली
(संग्रहकर्ता: भगवान दान हुकम दान जी)

Leave a Reply

Your email address will not be published. Required fields are marked *