प्रताप पच्चीसी – अजयदान जी लखाजी रोहडिया

प्रण पर बगसण प्राण, तृण सम नित ततपर रियो।
आजीवन आराण, परचंड किया प्रताप सी॥1

धरम सनातन धार, असह निपट संकट सह्या।
अकबर रो अधिकार, पर न मन्यो प्रतापसी॥2

हलदी घाट हरोळ, मेद पाट भिडीयो मरद।
तुरकों पर खग तौल, पग रोपै परतापसी॥3

अकबर रो अभिमान, मांन मिटावण मान रो।
जलम्यो जग महरांण, परम वीर परतापसी॥4

अकबर घन अंधकार, प्रसर्यो भारत मे प्रबल।
लग्यो न जोर लगार, प्रगट्यो रवि प्रतापसी॥5

तुरकां सूं जी तोड, भिडियो मेवाडा भलो।
मुगलों रा दळ मोड, पायो जस परतापसी॥6

अवनिप हलै अपंग, बैसाखी अकबर बळां।
उभौ तदै ऊतंग, पग बळ एक प्रतापसी॥7

कीधी थें कई वार, बिध बिध तलवारां थकी।
मुगलों ने मनवार, प्रेम धार परतापसी ॥ 8

राखी भल राणांह, मुख लाली मेवाड री।
मुगलज मुरझाणांह, पेख थनै परतापसी॥9

वाही जद करवाल, आरज ध्रम पर जवन पति।
तद बणियो तुं ढाल, प्राक्रम निज परतापसी ॥ 10

पालो बन पडियोह, अकबर आशा-बेल पर।
चेतकडै चढीयोह, परम शूर परतापसी॥11

भालो कर भ्राजेह, सिर छाजै सिर-त्राण सूं।
लख बबरी लाजेह, पंचानन परतापसी ॥ 12

प्याला शोणित पाय, रण चंडी राजी करी।
पल चर दीया धपाय, पल अरि दे परतापसी ॥ 13

मातृ भूमि हित मोह, त्यागौ सुख वैभव तणो।
विषयों मे वळगोह, पेख्यो नह परतापसी ॥ 14

राखी खत्रवट रीत, ऊमर भख भख ऊंमरां।
भयो न कद भयभीत, प्रणधारी परतापसी ॥ 15

परम धीर प्रणवीर, धरम धुरंधर वीर वर।
आफत मांय अधीर, पायो नंह परतापसी ॥ 16

पळ पळ दीना पांव, पुरखों रा पद चिह्न पर।
दियो न हीणै दाव, प्रसणों निज परतापसी ॥ 17

चाकर बण खितिपाल, पंड लागा जद पाळवा।
बखतां उण करवाल, पाणों ग्रही प्रतापसी॥18

नीची करी न नाड, राड कियां अरियों निडर।
भमियो बिहड पहाड, प्रण निभाण परतापसी ॥ 19

डूंगर डूंगर दौड, ठौड ठौड रण ठांणिया।
शीशोद्यो सिर मौड, पर न डग्यो परतापसी ॥20

धरम गणिका धार, महिपत अकबर सूं मिळ्या।
रह्यो सुतंत्र उणवार, पावन एक प्रतापसी॥21

मेटी थेंज मरोड, मेदपाट! मुगलेश री।
क्षत्रिय कुळ सिरमौड, प्रण न डिग्यो प्रतापसी॥22

क्षत्रिय लाज-जहाज, बूडत अकबर उदधि मह।
केवट वर इण काज, प्रगट्यो भुव परतापसी ॥ 23

मिट्टी मांय मिलाय, मनसूबा मुगलेश रा।
हिय वेर्यां हहराय, परसिध भयो प्रतापसी॥24

दया -धाम दीवांण, हिन्दू भांण महरांण भल।
पायो पद परमांण, परम “अजय “परतापसी ॥25

~~कवि श्री अजयदान जी लखाजी रोहडिया
(गांव-मलावा , तहसील रेवदर, जिला सिरोही)