रघुवरजसप्रकास [6] – किसनाजी आढ़ा

— 105 —

अथ चौटीबंध छप्पै लछण
दूहौ
आद कहै सौ अंत में, नांम गणत नरबाह।
सिरै कवित बंधै सिखा, चौटीबंध सराह।।२४६

अथ चौटीबंध छप्पै उदाहरण
सूरजपणौ सतेज, स्रवण अम्रत हिमकर सम।
उर दाहक सम आग, तौर सुर-राज राज तिम।।
सत हरचंद समांन, प्रगट दरियाव अथघपण।
सुर तर आस सपूर, जांण पारस सेवक जण।।
रवि अमी आग इंद चंद हरि, दूध सुरतरमण आद ले।
परभाव आठ निज कांम पर, एक रांम तन ऊझळै।।२४७

अथ हीराबेधी छप्पै लछण
दूहौ
एकण हीरौ विहरियां, दूजौ हीरौ थाय।
हीराबेधी कवित जिम, दोय अरथ दरसाय।।२४८

अथ हीराबेधी छप्पै उदाहरण
नारंगी संसार नीम, ऊंबर कर अंबह।
करणा सुभ करतूत, झाल हर कदमां झंबह।।
बोर छोड़ बावळा, खैर करमद बकायण।
बीजा धव बट बैत, ईख सुरतर नारायण।।
खरबूजा जग सह जाय रे, सौ असोक अमर सदै।
सैमळ सरीस तज आंन सुण, दाख रांमफळ सेवदे।।२४९

— 106 —

अथ करपल्लव नांम छप्पै लछण
दूहौ
आंगळियां करसूं अरथ, जेण कवितरौ होय।
आछी विध अह अक्खियौ, करपल्लव कह सोय।।२५०

अथ करपल्लव छप्पै कवित उदाहरण
यूं जे तैं न कियौ, करसु यूं जण जण आगळ।
यूं न लिया हरि अगै, लेस नितप्रत गदगद गळ।।
कीध यूं नह कदे, करसु तोपण विध दुख तन।
यूं न कियौ उण हेत, देस तौ यूं जग दन दन।।
यम येम ए मन कीयौ अधम, मूरख यूं जम मारसी।
यं कियौ ज तैं अहनिस अवस, यूं रघुनाथ उधारसी।।२५१

अरथ

हे प्रांणी तैं स्री रांमचंद्र आगै हाथ नहीं जोड़्या तौ तूं जणा जणा आगळ हाथ जोड़सी। जो तैं दसी आंगळ प्रभु आगै मुख में न लिया, तौ जगत आगै गदगद कंठ होय नित हाहा खासी नै आंगळी मूंढ़ा में लेसी। जे तैं श्री रांम आगै ऊभी आंगळी न कीदी, तौ सरीर में दुख पाय जणा जणा आगै ऊभी आंगळी करसी। ऊण ईस्वर निमत यूं कैतां देवा कै वासतै हाथ पांची आंगळ्यां सूं ऊंचौ न कीधौ तौ थारै जगत माथा में यूं पांची आंगळ्यां सूं डूचका देसी। यम कैतां प्रभु नै कदी पांच ही आंगळ्यां सू चंदण पुसप चढ़ाया अरच्या नहीं, फेर एम कैतां प्रभु री आरती उतारी नहीं, फेर यम कैतां प्रभु नै नमसकार प्रणांम कीधौ नहीं तौ यूं जम मार देसी, अर कदा’क तैं यूं कैतां आंगळ्यां सूं रात दिन माळा फेरे नै भजन कीधो छै तौ यूं कहतां बांह पकड़ नै भवसागर मां सूं, यूं स्री रघुनाथ उधारसी, इति करपल्लव कवित अरथ।

— 107 —

अथ हेकल्लवयण छप्पै लछण
दूहौ
यक सौ अर बावन अखर, जठै सरब लघु जांण।
एकल बयणौ कवित यूं, वदियौ नाग वखांण।।२५२

अथ हेकल्लवयण छप्पै कवित उदाहरण
तरण सरस छब तरण, सरण असरण हरखण सक।
मरण जनम भय मटण, धरण बड बरद रहत धक।।
अजर जरण रण असह, दन जद ससर सम वड दह।
लख दन समपण लहर, कहर चत अघट अथघ कह।।
भल करम मन वतन, अत दलभ, अखत बयण अह नर अमर।
कर हरख पहर अठ कव ‘कसन’, सधर समन रघबर समर।।२५३

— 108 —

अथ हल्लव नांम कवित लछण
दूहौ
वीस वीस चौतुक अखर, बेतुक कह बावीस।
हल्ल सबद वरणै सुमझ, हल्लव नांम कहीस।।२५४

अथ हल्लव नांम कवित उदाहरण
हल हल्लिय गिर आठ, सपत हल्लिय जळ सायर।
धूजह हल्लिय धरण, गिरद हल्लिय नभ छायर।
सिर हल्लिय अध सेस, हहर चित्त कछप हल्लिय।
हल्लिय दाढ़ वराह, दुसह हल हल्ल दहल्लिय।
हल हल्लिय लंक गढ़ बंकसौ दस-धू पै हल काहल्लिय।
हल्लिय पताख गजराज पै, विजै कटक राघव हल्लिय।।२५५

अथ कवित छप्पै नांम ताळूरब्यंब लछण
दूहौ
लागै पढ़तां ताळवै, जीहा अग्र जरूर।
कहजे छप्पय ‘किसन’ कवि, तिकौ ब्यंब ताळूर।।२५६

अथ ताळूरब्यंब छप्पै उदाहरण
रट रट रे नर ईस, नाय औणे जिण सीसं।
चाळ झाल कर चहूं, देस ईछत जगदीसं।।
ईस अचळ सरणाय रीझ इज्जत द्रढ़ रक्ख्यण।
दट दट अक्रत दूठ, ईस नां छोड अधक्खण।।
तीरथां इळा अट अट सतूं, देणौ चित सतसंग दुस।
दस सिर खळ गंजण दाख रे, जांनंकीनायक सुजस।।२५७

— 109 —

अहर अळग कवित छप्पै
दूहौ
पढ़तां होठ मिळै नहीं, ऊ प फ ब भ म न आंण।
कहियौ अह अन कवि कहै, अहर अळग सौ जांण।।२५८

अथ अहर अळग छप्पै उदाहरण
नारायण नरकार, नाथ नरहर जग-नायक।
कंज नयण कर कंज, तरण संतां खळ-तायक।।
धरणीधर गिरधार धनौ स्रीधर धू धारण।
हाथी ग्रह निज हाथ, तोय हूंता झट तारण।।
करुणा निधांन कोदंड कर, नित चालण यळ रीत नय।
रघुकुळ दिनेस जन लाज रख, जग अधार औधेस जय।।२५९

अथ विधांनीक जात छप्पै कवित लछण
दूहौ
ले खटहूंता नव लगै, वरणै मांझ विधान।
विधांनीक छप्पय वदै, वडा सुकवि बुधवांन।।२६०

अथ सप्त विधान छप्पै उदाहरण
कमळ उदध कळवरछ, भांण मघवांण, मेर ससि।
वदन, सहज, दत, तेज, राज, गरूवत दीठ लसि।।
सजळ, सलहर, सपत्र, सतप, सुरस्रंग, ससीतळ।
प्रात, पुनिम, मधु, जेठ, व्रखा, विग्रह, राका मिळ।।
प्रफुलंत, अथघ, दतवार, तप, औज, सरण, स्रावण, अम्रत।
तन एक रांम दसरथ सुतण, विहद सात गुण निरवहत।।२६१
इति पुरस प्रत विधांनिक

— 110 —

अथ सत्री प्रत विधांनिक छप्पै
सेस, इंदु, म्रग, दीप, जांण, कोकिल, म्रगपति, गज।
बेण, वदन, चख, नाक, बोल, कटि, जंघ, चाल, सज।।
असित, सकळ, चळ, सुथिर, गुप्त, अंगिरात, अक्रमत।
सुरत्रि, ब्योम, बन, अयन, नूत, पब्बय, सुब्यंध, थित।।
मयण, सरद, चकित, निस, रतिपतिह, लंघणीक, मंदह चलत।
मिथलेस कुवरि सीता सुतन, कवि एती ओपम कहत।।२६२
इति विधांनिक संपूरण

अथ नाट सला छप्पै लछण
दूहौ
यक तुक तौ थापै अरथ, अन तुक दियै उडाय।
नाट सलौ तिण कवित नै, सुकवि कहै सुभाय।।२६३

— 111 —

अथ नाट सला छप्पै
उदाहरण
सूर प्रभवतौ तेज, तेज नंह इम्रत स्रायक।
यिम्रत स्रायक चंद, चंद नह स्यांम सुभायक।।
स्यांम सुभायक मेघ, मेघ नह मायावंतह।
मायावंतह साह, साह नाहीं खर अंतह।।
खर अंत ततौ चित्रक अखव, नह चित्रक नर जांणिये।
नर नहीं नरां नायक निपट, प्रभव-भांण पहचांणिये।।२६४

अथ सुद्ध कुंडळियौ लछण
कायब दूहा सूं मिळै, कुंडळियौ सुध कत्थ।
अम्रत-धुन अनुप्रास घण, स्री रघुनाथ समत्थ।।
स्री रघुनाथ समत्थ, हत्थ धारण धनु सायक।
सेवक सरण सुधार, लेख सेवै पद लायक।
सीतानाथ सुजांण, पांण खग धन ब्रद पायब।
कुंडळियौ सौ कहै, मिळै दूहा सूं कायब।।२६५

— 112 —

अथ कुंडळियौ झड़ उलट लछण
दूहौ
दूहौ धुर धुर पच्छ तुक, आद अंत उलटंत।
वीस मत्त चो तुक वळै, सौ झड़ उलट समंत।।२६६

कुंडळिया झड़ उलट उदाहरण
भुज दंड लीजै भांमणा, अध्रियांवणा अभीत।
विध-विध दास वचावणा, जुध पावणा सजीत।।
जीत जुध पावणा, आद असुरां जरे।
सीस दस कुंभ घण, नाद सा स्यंघरे।।
सधर कर भभीखण, रिव जस रसांमणा।
भुजां रघुबर अडर, लीजिये भांमणा।।२६७

अथ कुंडळियौ जात दोहाळ लछण
दूहौ
सुध कुंडळिया अंत सुज, एक दूहौ फिर आख।
कुंडळियौ दोहाळ कह, भल राघव जस भाख।।२६८

अथ कुंडळियौ दोहाळ
उदाहरण
केकंधा लंका कहे, जस रघुनाथ सुजांण।
कहै भभीखण रविजकी, मुख हूं अवळीमांण।।
मुखहू अवळीमांण, किसूं पायक जस कत्थै।
दत देखा दत दहूं, सुजस जग कहै समथ्यै।।
कासीदी गुण करै, जिका कथ सह जग जांणै।
केतक डमरां कुसम उरड़ भमरां दळ आंणै।।
जुग जुग मुख ‘किसना’ जपै, नित नव नव एहनांण।
केकंधा लंका कहै, जस रघुनाथ सुजांण।।२६९

— 113/114 —

अथ कुंडळणी लछण
दूहौ
उगाहौ कर आद यक, तुक पलटै धुर भंत।
कायबरी तुक च्यारि कह, कुंडळणी स कहंत।।२७०

अथ कुंडल़णी उदाहरण
यिक रघुनाथ उजाळौ सारौ, रघुवंस जेण दुति सरसत।
विध जूं है कळ वाळौ, मझ सह नभं तेज करत तेजोमय।।
तेजोमय नभ होत, चंदहूंता जग चावौ।
एक सेस अजवाळ, सरब कुळ सरप सुभावौ।।
हेक मेर-गिर हुवै, सौ भगिर वंस सिघाळौ।
विध जिण सह रघुवंस, एक रघुनाथ उजाळौ।।२७१

कवित कुंडळिया १ सुध कुंडळिया २ झड़ उलट कुंडळिया ३ दोहाळ कुंडळिया ४ कुंडळणी ५
इति पंच प्रकार कुंडळिया संपूरण।

दूहा
मात्रा दंडक वरणिया, इण विध छंद उदार।
‘किसन’ रिझावण जस कियौ, रामचंद्र रिझवार।।२७२
किव राजां सूं किसन किव, यम अक्खै अरदास।
माफ करौ तगसीर मौ, देख रांम पय दास।।२७३
इति मात्रा व्रत संपूरण

— 115 —

अथ वरण व्रत (वृत) वरणण
दूहा
स्री गणनायक सारदा, दीजै उकत दराज।
वरण व्रति ‘किसनौ’ वदै, जस राघव महराज।।१
वरण व्रति सौ दोय विधि, कहै वडा कवि कत्थ।
वरणछँद उपछँद वद, स्री धर सुजस समथ्थ।।२
लेखव वरण छवीस लग, वरण छँद सौ वेस।
आखर छविसां ऊपरां, सौ उपछँद सरेस।।३

अथ एक वरण सूं लगाय छवीस वरण तांई छंदां री जात रा नांम वरणण।
कवित छप्पै
उक्ता अत्युक्ताह अखंत, मध्या, वखांणत।
वळे प्रतिस्ठा वेस, जगत सु प्रतिस्ठा जांणत।।
गायत्री ऊसणीक, अनुस्टप, व्रहती पंगत।
त्रिस्टुप जगती तवां, अती जगती सकरी मत।
अत सकरी अस्टती यिस्टि अख ध्रति।।
अति ध्रती, क्रती प्रक्रतीय।
आक्रति, विक्रति, फिर संसक्रती।।
अतक्रति, उतक्रति, हरि भजीय।।४

दूहौ
यकसूं वरण छवीस लग, बरण छंद की जात।
क्रीत रांम वरणण कियां, सुकवि सुमुख सरसात।।५

— 116 —

अथ छंद वरणण
दूहौ
एक गुरु स्री छंद कहि, दु गुरु छंद कहि कांम।
दोय लघु मधु, लघु गुरु, महि छँद रटि रांम।।६

अथ स्री छंद, जात उक्ता (ग)
गै । गै । स्री । थी । रां । कां।।७

कांम छंद (ग. ग. )
गौ दौ । कांमौ । गावौ । रांमौ।।८

दोय वरण छंद जात अत्युक्ता

मधु छंद (ल. ल. )
हरि । हरि । ररि । ररि ।।९

मही छंद (ल. ग. )
रमा उमा। प्रियं वियं। रटौ उठौ। अधं दघं।।१०

दूहौ
गुरु लघु सार वखांणजै, फेर मगण प्रस्तार।
आठ छंद तिण ऊपना, वे कवि नांम उचार।।११

ताळी १ ससी २ प्रिय ३ रमण ४
तवि मुणि पंचाळ ५ म्रगिंद्र ६ ।
किसन फेर मंदर ७ कमळ ८,
चवि जस राघवचंद्र।।१२

— 117 —

सार छंद (ग. ल. )
रांम, चंद, भूप, वंद, क्रीत गाय धन्य थाय।।१३

तीन वरण छंद जात मध्या छंद ताळी (ग. ग. ग. )
जौ बंदै, गोबंदै, तौ देही, नां रेही।।१४

छंद ससी (ल. ग. ग. अथवा यगण)
रटौ रांमचंदं, कटौ पाप कंदं।
करौ सुद्ध देहं, बडौ लाभ एहं।।१५

छंद प्रिया (ग. ल. ग. अथवा रगण)
रांम सीतापती, और वी अक्रती।
सिंध साभाय जे, पंकज पाय जे।
जीभ दीधी जकौ, क्यूं न गावै तकौ।।१६

छंद रमण (ल. ल. ग. अथवा सगण)
रट दासरथी, कथ बेद कथी।
रज जे पगरी, रिख नार तरी।।
हर चाप जिया, सत खंड किया।
रट सौ रसना, किव तूं किसना।।१७

छंद पंचाल़ (ग. ग. ल. अथवा तगण)
स्री रांम राजेस, सेवो ‘किसंनेस’।
जोवौ जसं जेस, भाखै भुजंगेस।।१८

— 118 —

छंद म्रिगेंद्र (ल. ग. ल. अथवा जगण)
नमौ रघुनाथ, सधीर समाथ।
गणां गजगाह, दसानन दाह।।
भभीखण आय, सु आस्रय पाय।
व्रवी जिण रंक, लछीवर लंक।।१९

छंद मंद (ग. ल. ल. अथवा भगण)
सीत-पती कह, ओघ अघं दह।
देह अभै करि, रांम रदे धरि।।
गावत पांमर, झूठ पयंपर।
ऊंबर सौ वित, कांय गमावत।।२०

छंद कमल़ (ल. ल. ल. अथवा नगण)
भगत-विछळ, नय‍ण कमळ।
जगत जनक, धरण-धनक।।
सिर नमि नमि, चरण पदम।
‘किसन’ रसण, रघुबर भण।।२१

अथ च्यार अखिर छंद जात प्रतिस्ठा
दूहौ
जीरण चरणह च्यार गुरु, धांनी रल पहिचांण।
जगण निगल्ली अंत गुरु, संमोहा गुरु बांण।।२२

— 119 —

छंद जीरणा (जीर्णा) (म. ग. )
सीता राघौ गावै सोई, जीता है जम्मारा जोई।
चेता राघौ नां चीतारै, है सोई जम्मारा हारै।।२३

छंद धांनी (र. ल. )
ईंद चंद्रमा अहेस, साधना करै महेस।
सीतनाथ रांमचंद, सीस नांम पाय वंद।।२४

छंद निगल्लिका (ज. ग)
दसाननं विनासनं, असेख पाप नासनं।
सदाजनं सिहायकं नमामि सीत-नायकं।।२५

पंचगुरु अखिर, पंचा अखिर छंद वरणण जात प्रतिस्ठा
छंद समोहा (म. ग. ग. )
सीता प्राणेसं, राजा-राजेसं।
गावौ स्री रामं, पावौ जे धांमं।।२६

दूहौ
हारी तगण सु करण यक, हंस भगण करणेण।
नगण दुलघु, मिळ जमकहि, जस भण राघव जेण।।२७

— 120 —

छंद हारी (त. ग. ग. )
धांनंख-धारी, पै नीत-चारी।
सौ सीळ सींधू, बाताद बंधू।।
सोहै सकाजं, जांनंक राजं।
जामात जोई, संभार सोई।।
रेवंस रूपं, भूपाळ भूपं।
सारंगपाणं, जीहा जपांणं।।
दी औध ईसं, पै बंद सीसं।
तूं धन्य तांमं, रे सेव रांमं।।२८

छंद हंस (भ. ग. ग)
रांम भजीजे, झौड़ तजीजे, लाभ सदेही, वेद वदेही।
संत सिहाई, राघवराई, वौ हरि गावौ, पै उध पावौ।।२९

छंद जमक (न. ल. ल. )
धर धनक, जग जनक।
दहण दुख, समुद सुख।।
अवधपत, सरस सत।
कमळकर, समर हर।।३०

— 121 —

अथ खड़ाखर छंद गायत्री
दूहौ
दोय मगण सेखा, तिलक सगण दु, रगण दोय।
वीजोहा दुजबर करण, सौ चऊरसा होय।।३१

छंद सेखा (म. म. )
राघौजी जौ गावौ, प्राझी लच्छी पावौ।
संतां कारी साता, देखी दीनां दाता।।३२

छंद तिलका (स. स. )
रघुनाथ रटौ, क्रत हीण कटौ।
कवसल्ल सुतं, दिननाथ दुतं।।
तन स्यांम सुभं, घण रूप लुभं।
कट पीत पटं, छज ओप छटं।।
कवि तूं ‘किसना’, रट सौ रसना।।३३

छंद विजोहा (र. र. )
नांम है रांम कौ, ओक आरांम कौ।
साच राघौ कथा, वांण दूजी ब्रथा।।३४

— 122 —

छंद चऊरस (ल. ल. ल. ल. ग. ग)
रिख मख त्राता, दित कुळ घाता।
सु भुज निघायौ, किरण उडायौ।।
गवतम नारी, रज पय तारी।
भव जय भाखी, सुर मुनि साखी।।३५

दूहौ
यगण संखनारी उभय, दोय तगण मंथांण।
दुजगण प्रियगण मिळ दहू, मदनक छंद प्रमांण।।३६

छंद संखनारी तथा विराज (य. य. )
(तथा छंद रसावळा)
रिखं साथ रांमं, गये कांम धांमं।
सुरं तीन भूपं, तहां आय नूपं।।
दसग्रीव बांणं, उभै जोर बांणं।
बियं आय तत्थं, ठयं मंच जत्थं।।
भुजं-बीस भल्लं, धनू काज हल्लं।
कसै चाप केमं, जती चीत जेमं।।
हजार दसानं, नृपं भंग मांनं।
पड़े जोर पोचं, अनंगेस सोचं।।

— 123 —

नरव्वीर रेणं, भई भांत केणं।
सुणे सेख तत्थं, कहे तांम कथ्यं।।
मिथल्लेस राजं, कहौ केण काजं।
नरब्बीर बांणी, महाहीण मांणी।।
हुवै रांम जत्थं, अखौ नां अकथ्थं।
उठे रांम तांमं, जगै कोप जांमं।।
कटं पीतपट्टं, सुबंधे सुघट्टं।
गतं पंचमुखं, चले चाप रूखं।।
करं बांम चापं, उठायौ अमापं।
नमायौ निखंगं, गुणं वाळ अंगं।।
रमानाथ रीसं, करंते कसीसं।
कुडंडं अचूकं, कियो टूक टूकं।।
सिया मात सुक्खं, विदेहं हरक्खं।
नृपं जीत जांमं, वरी सीत वांमं।।
जसं औधरायं, ‘किसनेस’ गायं।।३७

— 124 —

छंद मंथांरगी (त. त. )
सीता रमा सोय, कीजै समं कोय।
भाखौ परीभ्रंम्म, राघौ महारंभ।।३८

छंद मदनक (ल. ६)
सहदत सत, दसरथ सुत।
रिवकुळमण, रघुबर भण।।३९

दूहौ
दोय जगण यक चरण में, सौ मालती सुभाय।
कीरत जिण में ‘किसन’ किव, रट रट स्री रघुराय।।४०

छंद मालती (ज. ज. )
वडौ धन वेस, म खोय मुढेस।
चवां चित चेत, पुणौ मत प्रेत।।
भरणां धन भाग, रघुब्बर राग।।४१

अथ सप्त वरण छंद जात उस्णिक
दूहौ
रगण जगण पय अंत गुरु, समांनिका कह सोय।
दुजबर भगण पयेण जिण, छंद सबासन होय।।४२

छंद समांनिका (र. ज. ग. )
रांम नांम गाव रे, पाय कंज धाव रे।
जांनकीस जांण रे, वेस तूं जवांण रे।।४३

— 125 —

छंद सबासन
(४ ल. भ. अथवा न. ज. ल. )
खर खळ खंडण, महपत मंडण।
रसण वडापण, रघुवर जंपण।।४४

दूहौ
दुजबर जगण पयेण जिण, सौ करहची सुणंत।
सात गुरू पय जास मध, सीखा छंद सुमंत।।४५

छंद करहची
(४ ल. ज. अथवा न. स. ल. )
लसत चख लाज, सुकर धनु साज।
सझण सगरांम, रसण भज रांम।।४६

छंद सिखा
(७ ग. अथवा म. म. ग. )
जांणै सौ राघौ जांणै, ठांणै सौ राघौ ठांणै।
जीवाड़ै राघौ जैनूं, तौ मारै केहौ तेनूं।।।।४७

अथ अस्टाखिर छंद वरणण, जात अनुस्टप
दूहौ
आठ गुरू पद छंद जिण, विद्युन्माळा अक्ख।
गुरु लघु क्रम अठ वरण पद, सौ मल्लिक विसक्ख।।४८

— 126 —

छंद विद्युन्माल़ा
(८ ग. अथवा म. म. ग. ग)
राघौ राजा सीता रांणी, वेदां में धाता वाखांणी।
सौ गावै जोई है साचौ, कीटांनूं गावै सौ काचौ।।४९

छंद मल्लिका (र. ज. ग. ल. )
आच आब जेम आय, जोव तांस छीज जाय।
कोय अंत नाय कांम, रे अबूझ गाय रांम।।५०

छंद प्रमांणी तथा अरध नाराज तथा तुंग
(ज. र. ल. ग. )
दूहौ
लघु गुरु क्रम वरण अठ, छंद प्रमांणी कथ्थ।
दोय नगण फिर करण दे, सौ कह तुंग समथ्य।।५१

छंद प्रमांणी
नमौ नरेस राघवं, दराज पाय दाघवं।
उपंत स्यांम अंगयं, सनीर अव्र ढंगयं।।
दकूळ पीत लोभयं, सुरूप बीज सोभयं।
निखंग पीठ रज्जयं, सुचाप पांणि सज्जयं।।
मुखारविंद मोहनं, सुमंद हास सोहनं।
जु बांम अंग जांनकी, सु सोभना समांन की।।
वसंत ध्यांन मंजयं, ह्रदे महेस कंजयं।
तवै ज क्रीत तासयं, जनंम धन्य जासयं।।५२

— 127 —

छंद त्वंग तथा तुंग (न. न. ग. ग. )
दस सिर खळ दाहं, सुचित सुजन चाहं।
जप जप रघुराजं, सु भुज समर लाजं।।५३

दूहौ
दुजबर जगण सु अंत गुरु, कमळ छंदस कहांण।
भगण करण फिर सगण भिळ, मांन क्रीड़सु वखांण।।५४

छंद कमल (४ ल ज ग. )
रिव सुनिभ राजही, सुकर धनु साजही।
सुकव धर सीस जौ, अवधपुर ईस जौ।।५५

छंद मांनक्रीड़ा (भ. ग. ग. स. )
स्यांम भजै तांम सुखी, दांम भजै और दुखी।
सीतपती गाव सदा, राख जिकौ ध्यांन रिदा।।५६

दूहौ
च्यार तुकां लघु पंचमौ, खट आठम गुरु आंण।
दूजी चौथी सातमौ, लघु अनुस्टुप जांण।।५७

— 128 —

वारता

जींके चार ही तुकां पंचमौं अखिर लघु आवै, अरु छठौ आठमौ गुरु आवै, दूजै, चौथे, सातमौ लघु आवै, च्यार ही तुकां सौ अनुस्टुप छंद छै। पैलो तीजौ अछिर कौ गुरु लघु कौ नेम ही नहीं, गुरु आवै भावै लघु, पंचमौ अखिर च्यार ही तुकां लघु, छठौ च्यार ही तुकां गुरु। दूजी चौथी तुक रा सातमौ अखिर लघु आवै सौ अनुस्टुप कै छै।

छंद अनुष्टुप
राघव जपतौ प्रांणी, मूढ आळस मां करै।
आव दरब आळपं, चेता अंध सचेत रे।।५८

अथ ब्रहती जात नव-अखिर छंद वरणण
दूहौ
महालिछमी पद मही, तीन रगण दरसंत।
दुजबर करणह सगण दखि, सारंगिका लसंत।।५९

छंद महालक्षिमी (र. र. र. )
रांम राजै रसा रूप रे, नेतबंधी वणै नूप रे।
सीत वाळौ पती साच रे, रे मना जेणहूं राच रे।।६०

छंद सारंगिका
(४ ल. ग. ग. स. अथवा न. य. स. )
रघुबर भीली कर रे, बिलकुल सीताबर रे।
रुचि करकंधू फळ रे, जमि हसि पीधौ जळ रे।।६१

— 129 —

दूहौ
मगण भगण फिर सगण मुणि, पायत छंद प्रकास।
गण बे दुजबर एक गुर, रति पद सौ सुख रास।।६२

छंद पायत (म. भ. स. )
तौ पै धूळी सिल तरगी, वारी सारै वारी सारै हि. . . . . .।
ऊं ही राघौ तरणि उडै, छै य्यौ साकौ स कुळ छुडै।।
धोवौ पै तौ कदम धरौ, कै कीरौ कै करौ।।६३

छंद रतिपद (८ ल. ग. अथवा न. न. स. )
धरण कर धनक है, जगत सह जनक है।
समर कळतरस है, सुज जनम सरस है।।६४

दूहौ
न स य बिंब तोमर सगण, यक बे जगण स कोय।
च्यार करण गुरु एक सौ, रूपा-माळी होय।।६५

छंद बिंब (न. स. य. )
मुण महण तार माथै, सुज गिरवरां समाथै।
खळ सबळ वंस खोयौ, जग सरब तेण जोयौ।।
जस ‘किसन’ ते जपीजै, लभ रसण देह लीजै।।६६

— 130 —

छंद तोमर (स. ज. ज. )
कटि तूंण चाप कराग, खळ भंज रावण खाग।
पह सिद्ध बंधण पाज, मनमोट स्री महराज।।
तिय जांनुकी भरतार, कुळमौड़ भू करतार।
जप पात तूं अठजांम, रिव वंस ओपम रांम।।६७

छंद रूपमाल़ी (९. ग. अथवा म. म. म. )
आपे लंकासी मौजां यूं ही, तौ जेहौ आखां दाता तूं ही।
थूरै जंगां के दैतां थौका, झौका झौका जी राघौ झौका।।६८

अथ दस अखिर छंद वरणण जात पंक्ति
दूहौ
एक सगण बे जगण गुरु, संजुतका सौ गाय।
चंपक माळा भ म स गुरु, त्रिभग सारवति ठाय।।६९

छंद संजुतका (स. ज. ज. ग. )
जय रांम संत सिहायकं, घण दैत आहव घायकं।
मिथळेस राजकुमारयं, उरहार प्रांण अधारयं।।
तन कंद स्यांम सुभावनं पटपीत विद्युत पावनं।
‘किसनेस’ पात उधारयं, धनु बांण पांणसु धारयं।।७०

— 131 —

छंद चंपकमाळा (भ. म. स. ग)
गोह सरीखा पांमर गाऊं, ब्याध कबंधा ग्रीध बताऊं।
नै सट पापी गौतम नारी, ते रज पावां भेटत तारी।।
देव सदा दीनां दुख दाघौ, रे भज प्रांणी भूपत राघौ।।७१

छंद सारवती (भ. भ. भ. ग. )
चाप करां नृप रांम चढ़े, मांझ रजी तद भांण मढ़े।
खौहण के असुरांण खपे, पंख सिवा पळ खाय त्रपे।।
रे नित सौ जन भीड़ रहै, कूंण जनां दुख देण कहै।।७२

दूहौ
तगण यगण भगणह गुरु, सुखमा छंद सुभाय।
नगण जगण नगणह गुरु, अम्रित गत यण भाय।।७३

— 132 —

छंद सुखमा (त. य. भ. ग. )
नागेस भजै राघौ नत ही, साधार धरा भासै सत ही।
जे गाव कवि तूं धन्य जथा, क्यूं और बखांणै आळ कथा।।७४

छंद अमिृत गति (न. ज. न. ग. )
दसरथ राजकँवर है, सुभ कर धांनख सर है।
रघुबर सौ किव रट रे, मळ तनचा सब मट रे।।७५

अथ एकादस अखिर छंद वरणण, जात त्रिस्टुप
दूहौ
तीन भगण दौ गुरु जठै, दोधक छंद स दाख।
दोय लघु त्रय सगण पद, सौ सुमुखी अहि साख।।७६

छंद दोधक (भ. भ. भ. ग. ग. )
राघव ठाकुर है सिर ज्यां रै, तौ किसड़ी घर ऊंणत त्यां रै।
की जिण राखस सेव करी सी, वेख भभीखण लंक वरी सी।।७७

छंद समुखी (ल. ल. स. स. स. अथवा न. ज. ज. ल. ग. )
जय जय राघव दैतजई, महपत मूरत साचमई।
हरण अनेक विघंन हरी, कमळ करं प्रतपाळ करी।।७८

— 133 —

दूहौ
दोय करण फिर रगण दौ, अंत एक गुरु आंण।
सुणियौ खग कहियौ सरप, छंद सालिनी जांण।।७९

छंद सालिनी
(४ ग. र. र. ग. अथवा म. त. त. ग. ग. )
गावै राघौ सौभणौ पात गाढ़ौ।
आखै वांणी यूं ‘किसन्नेस’ आढ़ौ।।
ते भूला राघौ, विगूतौ भवि त्यांरौ।
जांणैसी पीछै वडौ भाग ज्यांरौ।।८०

दूहौ
दौ दुजबर अंतह सगण, मदनक छंद मुणंत।
गुरु लघु क्रम ग्यारह वरण, सौ सेनका सुणंत।।८१

छंद मदनक (८ ल. स. अथवा न. न. न. ल. ग. )
हरण कसट जन हर है।
विमळ बदन रघुबर है।।
सरब सगुण सह सरसै।
दनुज दहण भुज दरसे।।८२

— 134 —

छंद सैनिका
(ग. ल. ग. ल. ग. ल. ग. ल. ग. ल. ग. अथवा र. ज. र. ल. ग)
माथ पंच दूण जुद्ध मारणं।
धांनुखं सरेण पांण धारणं।।
बार बार रांम क्रीत बोल रे।
ताहरौ वडौ कवेस तौल रे।।८३

दूहौ
मालतिका ग्यारह गुरु, बि तगण ज करण जांण।
छंद इंद्र वज्रा छजै, वड कवि रांम वखांण।।८४

छंद मालतिका
(११ ग. अथवा म. म. म. ग. ग. )
राघौ रूड़ो स्री सीता स्वांमी राजै।
भारांथां लाखां दैतां थौका भांजै।।
जैनूं जीहा रातौ-दीहा जी जंपौ।
कांतौ थे कीनासाहूंता ही कंपौ।।८५

छंद इंद्र वज्र (त. त. ज. ग. ग. )
गोपाळ गोव्यंद खगेस-गांमी।
नागेस सज्या क्रत सैन नांमी।।
है जंग वागां दस-माथ हंता।
माहेस बाछळ्य सुकंठ मीता।।८६

— 135 —

दूहौ
जगण तगण जगण करण, छंदस वज्र उपेंद।
वज्र इंद ऊपयंद पद, मिळ उपजाती छंद।।८७

उपेंद्रवज्रा (ज. त. ज. ग. ग. )
अरेस जेतार जुधां अथाहं।
बिसाळ ऊरंसु अजांनबाहं।।
धनेस देवेस दुजेस ध्यावै।
गुणीस राघौ नित क्यूं न गावै।।८८

छंद उपजात
स्री जांनुकीनाथ सदा सराहौं।
चिंतस बीजौ भजवा न चाहौ।।
दीनांदयावंछित मौज दाता।
भला गुणां जोग अहेस भ्राता।।८९

— 136 —

दूहौ
रगण नगण रगणह ध्वजा, रथोद्धिता सौ होय।
रगण नगण भगणह करण, जिकौ स्वागता जोय।।९०

छंद रथोद्धिता (र. न. र. ल. ग. )
गौर स्यांम सिय रांम गाव रे, पात तूं सपद ऊंच पाव रे।
नेक पाप हर जेण नांम रे, राज राज जगमौड़ रांम रे।।९१

छंद स्वागता (र. न. भ. ग. ग. )
रांम नांम सर पाथर तारे, आप पांण कपि सेन उतारे।
जेण नांम सिव संकर जापै, मांझ कासि नर मोख समापै।।९२

अथ द्वादसाखिर छंद जात जगती
च्यार यगण पदप्रत्त चवां, छंद भुजंगप्रयात।
लिखमीधर पदप्रत सुलछ, रगण च्यार दरसात।।९३