गीता रौ राजस्थानी में भावानुवाद-तेरहवौ अध्याय

।।श्लोक।।
उपद्रष्टानुमन्ता च भर्ता भोक्ता महेश्वर:।
परमात्मेति चाप्युक्तो देहेऽस्मिन् पुरुष: पर:।।२२।।
।।चौपाई।।
जीव देह सूं उपद्रष्टा व्है
आग्या देवण अनुमन्ता व्है।
भर्ता भोक्ता ईश कहावै
तन में रह हरि ए अळगा व्है। २२।।
{(उपद्रष्टा=देह सूं सम्बन्ध राखणियौ)(अनुमन्ता=अनुमति देवण वाळौ)
(भर्ता=भरण-पोषण करण वाळौ)(भोक्ता=सुख-दु:ख भोगण वाळौ)}
।।भावार्थ।।
भगवान् श्रीकृष्ण कैवै-हे अर्जुन! जीवां रौ शरीर रै सागै सम्बन्ध होण सूं उपद्रष्टा वाजै। अर उण रै सागै मिल ‘र सम्मति, अनुमति देणा सूं अनुमन्ता वाजै अर अन्न-जळ ग्रहण करण सूं भर्ता वाजै औ सुख-दु:ख भोगै इण खातर भोक्ता वाजै है। औ खुद इण रौ मालिक मानण सूं महेश्वर बण जावै पुरुष सै सूं लूंठौ है, परम आत्मा है इण खातर औ परमात्मा वाजै है औ देह में रै’तौ थकौ ई सब सूं सम्बन्ध रहित है।

।।श्लोक।।
यावत्सञ्जायते किञ्चित्सत्त्वं स्थावरजड़्गमम्।
क्षेत्रक्षेत्रज्ञसंयोगात्तद्विद्धि भरतर्षभ।।२६।।
।।चौपाई।।
जकौ जीव ज जलमिया जैड़ा
वै थावर या जंगम वैड़ा।
खेत आतमा सूं जायेड़ा
जाण इसां रा पार ज बेड़ा।।२६।।
(खेत=क्षेत्र, आत्मा=क्षेत्रग्य)
(जायेड़ा= जलमियोड़ा)
।।भावार्थ।।
भगवान् श्रीकृष्ण कैवै-हे भारत वंशियां में सिरै अर्जुन!वै जितरा ई स्थावर अर जंगम जीव जलमे है वां नै थूं खेत (क्षेत्र)अर आतमा (क्षेत्रग्य) रै संयोग सूं पैदा व्हियोड़ा जाण।