रीत-नीत तज राड़ करै

रीत-नीत तज राड़ करै,
बाखळ में ऊभ बोबाड़ करै,
परिवार दुखी वां पूतां सूं,
कुळ नै रिगदोळ कबाड़ करै।
सावळ कावळ रो भान नहीं,
कुळ गौरव रो अभिमान नहीं,
लालच रै लपकां लाग्योड़ा,
ऐ गिणै कोई अहसान नहीं।
भावां रा मनमें टोटा है,
हिवड़ै रा घेरा छोटा है,
ज़िंदा माखी नै गिट ज्यावै,
ऐ मतोमती रा मोटा है।
ऐ साखसीर रा सौदागर,
ऐ कूड़ कपट रा कारीगर,
भुरक्यां में जग नै भरमावै,
बोली रा इसड़ा बाजीगर।
हरदम स्वारथ रा हामी है,
निमळा अर ढीठा नामी है,
खावै उण मैं ही छेद करै,
ऐ पक्का नमक हरामी है।

~~डॉ गजादान चारण “शक्तिसुत”