सदा ऋचावां साम री

रस मय कविता गागरी, छलके दोहा छंद।
डिंगळ री डणकार में, आठ पोर आणंद॥1

मन रो नाचै मोरियौ, आठ पोर अणमाप।
डिंगळ री डणकार में, डफ  मृदंग री थाप॥2

वीण पाणि वर दायिनी, बसती अठे विशेस।
आठूं पोर उछाळती,कविता रतन हमेश॥3

छंदां उडती छोळ,  घणकंठ डिंगळ गीतडा।
रस कविता रमझोळ, सुरसत री बाजे सदा॥4

कविजन करे किलोळ,हरदम भाव हिलोळ सुण।
छंद गीत लय छोळ, बरसे डिंगळ पोळ में॥5

सदा ऋचावां साम री, गूंजै डिंगळ गान।
करे मोद धर कवि मुनी,अर श्रोता रसपान॥6

लय सुर री लहरी अठे, जळतरंग रे जेम।
जिणने सुण गुणिजन सखा!,माथौ धुणै न केम॥7

~~नरपतदान आसिया “वैतालिक”