शिव-सुजस

।।दूहा।।
गुमर त्याग भजजै गुणी, नाथ अमर रो नाम।
मिटै तिमिर धिन अमल़ मन, समर ऊमा रो साम।।1
जग जाल़ा मेटण जरू, वर मृगछाल़ा वेश।
रुंडमाल़ा पर रीझियो, माल़ा रटत महेश।।2
भसमी अंगा भलहल़ै, मन चँगा महादेव।
इकरंगा रख अडगता, सिर गंगा मन सेव।।3
विघन विनासी विघनहर, तो सुखरासी तात।
उगत उपासी आपणा, नमो कासीपुर नाथ।।4

।।छंद -त्रिभंगी।।
कासीपुर नाथम सो समराथम, नमो अनाथम हे नाथम!
इहगां दे आथम सत सुखदातम, रसा ज बातम दिनरातम।
धिन हो जो ध्यातम माथै माथम, हर निज हाथम हरमेसर।
भगवन भूतेसर जयो जटेसर, नमो नंदेसर नटवेसर।।1

कन कुंडल़धारी कमँडलधारी, गिरजा नारी गिरनारी।
भोल़ो भंडारी विजया जारी, आपू भारी आहारी।
दुनिया दुखियारी सिमरै सारी, संकट हारी शंभेसर।
भगवन भूतेसर जयो जटेसर, नमो नंदेसर नटवेसर।।2

वपधार बाघबंर देव डिगबंर, निमख आडबंर नेस नहीं।
दीठो नह डंबर मांहिस मंदर, सुंदर अंदर साज सही।
किवल़ासा कंदर किन्नर गंदर, साथ बडेसर सिद्धेसर।
भगवन भूतेसर जयो जटेसर, नमो नंदेसर नटवेसर।।3

डमरू डमडम्मा घंट घुरम्मा, रास रम्ममा रचयिमा।
नवही नाथम्मा माथ मुनम्मा, जोगणयम्मा जूथमा।
चारण चरणम्मा जस जापम्मा, पाप हरम्मा परमेसर।
भगवन भूतेसर जयो जटेसर, नमो नंदेसर नटवेसर।।4

भल़कै ससि भाल़म देव दयाल़म, पह प्रतपाल़म पखपाल़म।
भल शूल़ भूजाल़म दुष्ट दंडाल़म, कंपै काल़म विकराल़म।
विसधरण विसालम धर मुंडमालम, गल़ै विचाल़म बलदेसर।
भगवन भूतेसर जयो जटेसर, नमो नंदेसर नटवेसर।।5

नितप्रत नंगा ऊजल़ अंगा, ऊमा संगा अरधंगा।
इल़ बात अभंगा उथल़ अनंगा, सो मन चंगा सरभंगा।
जीतै जुड़ जंगा रह इगरंगा, घट उछरंगा गंगेसर।
भगवन भूतेसर जयो जटेसर, नमो नंदेसर नटवेसर।।6

वर पूत वडाल़ा देव दूंधाल़ा, विघन प्रजाल़ा विरदाल़ा।
संतन रखवाल़ा साम सूंडाल़ा, सगती बाल़ा सचियाल़ा।
जग अघ रा जाल़ा काटणवाल़ा, गजतन वाल़ा गणधेसर।
भगवन भूतेसर जयो जटेसर, नमो नंदेसर नटवेसर।।7

भगतन भयहारी तूं त्रिपुरारी, बात तिहारी बल़िहारी।
गावे गिरधारी नित निरहारी, राख हमारी रखवारी।
सुण उगत उचारी सदगत वारी, कीरत थारी करुणेसर।
भगवन भूतेसर जयो जटेसर, नमो नंदेसर नटवेसर।।8

।।छप्पय।।
नमो कासीपुर नाथ, नमो समसाण निवासी।
भंग पिपासी भाल़, नमो अघ जग रा नासी।
दुष्ट विणासी देव, साच संतां सुखरासी।
सो बासी मुख सेव, पेख सको फल़ पासी।
अवनासी ईस अजरा अमर, धिनो सीस गँगधार ब्है।
पड़ चरण दास गिरधर पढे, सो अरजी स्वीकार व्है।।

~~गिरधर दान रतनू दासोड़ी